Den un forma simbóliko presidente di e ekipo di futbòl SV La Fama David Molina a hasi entrega di un tishùrt na gezaghèber Edison Rijna. Pa medio di benta di e tishùrt akí, SV La Fama ta bai rekoudá fondo komo aporte na e esfuersonan inmenso na Colombia pa evitá ku hòbennan ta stòp tempran ku skol i ta resultá den prostitushon òf drogadikshon.
Mirando ku SV La Fama fo’i 2016 a bin ku diferente proyekto riba tereno sosial a krea e idea “Medellin - Bonaire Unídos por siempre”, kaminda SV La Fama a laga diseñá un tishùrt ku ta kontené emblema di e spònsernan ku a traha huntu ku SV La Fama pa por a yega na e proyekto. Bendiendo e tishùrtnan tantu na Boneiru, Aruba i Kòrsou lo yuda realisá e kousa pa e hóbennan na Colombia por yega na fondo pa kumpra material pa asina nan tambe por hasi nan deporte preferí. Gezaghèber Rijna a keda sumamente kontentu ku e inisiativa akí i na mes momentu a duna un kontribushon na e ekipo.
Riba foto gezaghèber Rijna i presidente di SV La Fama David Molina.
