Awe gezaghèber John Soliano ofisialmente a risibí e promé karchi pa Ride for the Roses. Ku e momentu simbóliko akí el a duna e señal di salida pa e aktividat deportivo benéfiko akí, ku ta tuma lugá dia 1 di febrüari 2026 i ku ta pidi atenshon pa e lucha kontra kanser na Boneiru. Ride for the Roses ta un evento anual kaminda e partisipantenan pa medio di kore baiskel, kana òf kore ta rekoudá fondo pa organisashonnan lokal ku ta komprometé nan mes pa sosten di pashèntnan di kanser i nan famia.
Ride for the Roses ta mundialmente konosí: tur aña míles di hende ta partisipá pa mustra solidaridat ku tur hende ku direktamente òf indirektamente tin di haber ku kanser. Na Boneiru tur e entrada ta bai kompletamente na benefisio di inisiativanan lokal i institutonan di kuido ku ta brinda sosten na e pashèntnan i nan sernan kerí, i na proyektonan relashoná ku prevenshon i informashon.
Partisipá i hasi e diferensia
Tur hende por partisipá: grandi i chikí, den forma deportivo òf rekreativo. Kumpra bo karchi, subi riba bo baiskel òf bisti bo sapatu di kana, i kontribuí na un futuro ku mas speransa i mihó kuido pa nos bonerianonan ku ta biba ku kanser.
Karchi ta optenibel for di awor
Por haña mas informashon tokante ruta, karchi i patrosinio (sponsoring) via e organisashon di Ride for the Roses riba www.ridefortheroses.org.
