Gezaghèber i su esposa a bishitá Aruba pa selebrashon di Dia di Betico Croes 2025

For di djabièrnè 24 di yanüari te ku djadumingu 26 di yanüari 2025 Gezaghèber di Entidat Públiko Boneiru, señor John Soliano i su esposa a bishitá nos hermana isla Aruba riba invitashon di gobièrnu di Aruba pa akudí na selebrashon di Dia di Betico Croes. Gezaghèber Soliano i su esposa tabata presente na diferente aktividat ku a keda organisá na honor di Betico Croes, kende tabata un figura di sumo importansia den historia i emansipashon di pueblo di Aruba.

Gezaghèber a kuminsá su bishita hasiendo akto di presensia na un manifestashon kultural riba djabièrnè anochi kaminda tabatin músika, baile i vários presentashon na honor di Betico Croes. Akí Gezaghèber por a gosa di músika di e All Star Band bou di guia di e músiko boneriano Dwigth Leoneta, ku a animá e anochi i a kompañá e diferente artistanan. Riba djasabra 25 di yanüari 2025, Gezaghèber a akudí na e seremonia ofisial pa konmemorá e di 32 selebrashon di Dia di Betico. Gezaghèber Soliano: "Loke a sobresalí den e selebrashon akí, ta e balornan ku Betico a laga atras pa komunidat Rubiano. Balornan manera sakrifisio, determinashon i dignidat."

Durante e seremonia ofisial, Gezaghèber a topa ku diferente persona, entre otro Promé Minister di Aruba, sra. Evelyne Wever Croes, Minister di Kultura di Aruba, sra. Xiomara Maduro i sr. Wendrick Cicilia, e miembro mas hóben di parlamento di Aruba, ku ta di tata boneriano i ku tambe a biba na Boneiru.

Djasabra anochi Gezaghèber Soliano a bishitá e Hadrei di Fausti, den e bario di Brazil, kaminda el a presensiá un selebrashon típiko di Dia di Betico i a asta baila un re-mai-lo. Bishita di Gezaghèber Soliano na Aruba pa e selebrashonnan akí, ta suprayá e lasonan fuerte i duradero entre Boneiru i Aruba. E relashon entre nos islanan ta unu di hermandat estrecho, ku lasonan familiar di hopi generashon i elementonan di kultura komún. Ku esaki den mente, nos islanan ta i lo sigui traha huntu riba diferente reto komún, den solidaridat ku otro. Ku palabranan di Betico: No tin lucha sin sakrifisio, i no tin sakrifisio sin gloria.

Gezaghèber di Boneiru i su esposa tambe a deseá pueblo di Aruba un felis Dia di Betico 2025.