Djaluna, 2 di désèmber último Gezaghèber di Boneiru Sr. John Soliano a risibí bishita di señora Denise de Jongh-Rekwest, outor i editor di diferente buki. Durante e bishita akí Gezaghèber a haña un ehemplar di e buki nobo ‘Kantika di tur tempu, pa semper’.
Sra. De Jongh a splika Gezaghèber Soliano ku meta i kontenido di e buki akí ta pa preservá letra i melodia original di e kantikanan folklóriko oralmente transmití di Boneiru, kaminda tabata kanta hende. E kantikanan original akí ta data for di tempu di sklabitut. Nan ta di orígen afrikano i a kuminsá kanta nan na Rincon, hopi di nan den Washington-Slagbaai. Despues a sigui kanta nan den otro barionan di Boneiru. Kada un kantika tin su historia mará na dje i ta basá riba realidat.
Den e buki tin historia, letra i tambe partitura di kada kantika folklóriko.
Entidat Públiko Boneiru; Edukashon i Bienestar i SKAL tabata enkargá ku produkshon di e buki balioso akí. Un proyekto mashá importante pa konservá kultura di Boneiru i su traspaso pa futuro generashonnan.
