Gezaghèber Edison Rijna a haña invitashon pa hiba palabra na e World Conservation Congress ku e union internashonal pa protekshon di naturalesa IUCN ta tene for di 3 te ku 11 di sèptèmber na e siudat franses Marseille.
Un biaha den kuater aña riba inisiativa di IUCN lidernan polítiko, trahadónan di maneho, sientífikonan, empresarionan i protektornan di naturalesa di henter mundu ta bini huntu pa papia ku otro tokante importansia di medio ambiente natural pa kalidat di bida na mundu. Oradornan na Marseille ta entre otro e presidente di Banko Sentral Oropeo Christine Lagarde i komisario di Union Oropeo Frans Timmermans.
Durante e kongreso Stinapa, den koperashon ku Dutch Caribbean Nature Alliance (DCNA) i e komité hulandes di IUCN, ta organisá un simposio tokante protekshon di naturalesa na Hulanda Karibense. Gezaghèber Rijna a aseptá e invitashon pasobra e kongreso ta ofresé un oportunidat úniko pa presentá e konsepto di Blue Destination riba un podio internashonal i pa hasi kontakto ku partidonan ku por sostené Boneiru ku realisashon di esaki. Pa e motibu akí gezaghèber Rijna lo hasi uso di su presensia na Marseille pa tene kòmbersashonnan eksploratorio ku posibel partnernan di koperashon.
Debí na entre otro kresementu di poblashon i desaroyo ekonómiko, mundialmente naturalesa ta bou di preshon. Pa enfrentá e menasanan a bini ku e asina yamá ‘inisiativa 30x30’ ku e intenshon pa na aña 2030 ofresé por lo ménos 30% di tur ekosistema riba tera i bou di awa protekshon legal kontra mas daño.
Ku Parke Nashonal Washington-Slagbaai i Parke Marino ya kaba Boneiru ta kumpli ampliamente ku e 30% ei, pero pa Kolegio Ehekutivo i e organisashon di naturalesa Stinapa esaki no ta un motibu sinta ketu: nos naturalesa na Boneiru tambe ta sufri bou di kontaminashon i kambio di klima.
