Riba djabièrnè 8 di ougùstùs 2025 gezaghèber John Soliano a para ketu na su promé aña den funshon. Durante algun entrevista na diferente medio di komunikashon el a tira un bista bèk riba un aña ku p’e tabata intenso, edukativo i signifikativo: “Un aña yen di desafio, durante kua mi a mira hopi, skucha hopi, siña hopi i traha hopi huntu”, segun gezaghèber.
Gezaghèber a ekspresá su gratitut pa e sosten amplio ku el a risibí for di nos komunidat i for di partnernan di kadena, i el a aksentuá e importansia di kolaborashon komo fundeshi pa progreso.
Soliano a hasi uso di e oportunidat tambe pa wak padilanti den direkshon di e añanan binidero ku e ta den funshon. Tres tema ta sentral pa nos gezaghèber: bon gobernashon, siguridat i inklusividat.
Bon gobernashon komo promesa
Soliano a suprayá ku bon gobernashon no ta un meta riba su mes, pero un promesa na komunidat: “Un promesa di transparensia, siguridat hurídiko i enbolbimentu.” Segun gezaghèber muchu hopi biaha habitantenan tin e sintimentu ku gobièrnu ta laga nan na kaya. Esaki ta hasi daño na e konfiansa i e ta hasi gobernashon efektivo mas difísil. Gezaghèber ta spera ku den e próksimo añanan lo tin un gobernashon stabil. For di su ròl e ke kontribuí pa medio di edifiká un kultura konfiabel di gobernashon i un infrastruktura atministrativo ku ta fasilitá bon gobernashon.
Siguridat
Komo esun ku ta karga responsabilidat final pa òrden públiko, Soliano a enfatisá e importansia di su kolaborashon ku polis, hustisia i partnernan di kadena pa manehá e desafionan grandi riba tereno di siguridat durante e aña tras di lomba. “Aunke nan medionan i nan forsa laboral ta limitá, nos polisnan ta traha duru pa manehá siguridat na nos isla. Pa esaki mi tin hopi apresio”, segun nos gezaghèber. Den su promé aña gezaghèber a hasi uso di medidanan drástiko manera área di riesgo di siguridat i supervishon ku kámara pa salbaguardiá òrden públiko. Soliano ta bisa ku e ta traha riba stabilisashon di e situashon i relashoná ku esaki e ta hasi un yamada riba nos komunidat pa kontribuí ku nan granito. Ta huntu nos ta edifiká siguridat.
Inklusividat komo norma
Segun Soliano, un Boneiru fuerte ta un Boneiru inklusivo, kaminda tur hende por sinti nan mes mirá, skuchá i apresiá. Teniendo kuenta ku un komunidat ku ta kambiando rápidamente, den su kòmbersashonnan i diskursonan den e aña tras di lomba, kada biaha gezaghèber a purba aksentuá balor di inklusividat. “Inklusividat no ta un proyekto, sino un sierto aktitut. E ta kuminsá na kon nos ta anda ku otro diariamente: ku rèspèt pa balor di kada hende”, segun gezaghèber Soliano.
Wak padilanti ku konfiansa
Gezaghèber ta ekspresá su apresio pa e manera ku nos komunidat a bras’é. “Ku gratitut mi ta wak bèk riba e konfiansa ku e komunidat akí a duna mi. Esaki ta duna mi energia pa sigui padilanti.” Ku speransa gezaghèber ta wak den direkshon di futuro: E tareanan ta grandi, pero e boluntat pa logra ta mas grandi. Laga nos sigui edifiká un demokrasia fuerte, un komunidat seif i un isla kaminda tur hende ta konta.”
