Gerente nobo di kuerpo ta bishitá gezaghèber Rijna

Den kuadro di sera konosí ku nos islanan Monique Commelin, kende resientemente na nòmber di  minister di Hustisia i Siguridat a kuminsá traha komo gerente di kuerpo pa Kuerpo Polisial Hulanda Karibense i Kuerpo di Bombero Hulanda Karibense, a bishitá gezaghèber Rijna. Esaki el a hasi huntu ku Frank Paauw, hefe di polis di e unidat di Amsterdam i alabes titular di kartera pa área karibense dentro di e aparato polisial hulandes. E gerente di kuerpo ta responsabel pa un bon organisashon di polis i kuerpo di bombero pa Hulanda Karibense. Durante e momentu di sera konosí nan a papia tokante e desaroyonan den e dos organisashonnan akí, den kua gezaghèber a base di su responsabilidat pa òrden públiko i siguridat i den kaso di kalamidat, tambe tin hopi  interes. Banda di esei a papia tokante aserkamentu di krímen organisá, manera labamentu di plaka i kontrabanda di droga. E establesimentu planiá di un punto sentral di konekshon marítimo i kreamentu di un Sentro Regional pa Informashon i Ekspertisio pa minamentu lo yuda ku aserkamentu di esaki.