Diputado Joselito Statia awe, 29 di yüni 2026, a entregá su retiro por eskrito komo miembro di Kolegio Ehekutivo. Ku entrega di e retiro, señor Statia ta stòp inmediatamente ku su funshon komo diputado.
Entidat Públiko Boneiru ke duna komunidat klaridat tokante situashon di gobernashon. Kolegio Ehekutivo ta keda ful outorisá pa ehersé su tareanan. Konforme e reglanan ku ta konta, Kolegio Ehekutivo ta konsistí di gezaghèber i un mínimo di dos diputado. Pues ku e dos diputadonan ku ta den funshon, Kolegio Ehekutivo ta sigui funshoná ful.
Dunamentu di servisio na komunidat ta sigui sin kita sin pone, e tareanan diario ta sigui manera kustumber.
Na e momento akí no a regla ainda ta ken ta bira susesor di señor Statia. Asina ku tin mas klaridat, Entidat Públiko Boneiru lo informá komunidat tokante esaki.
Por último Entidat Públiko Boneiru ta yama señor Statia danki pa su dedikashon durante su periodo komo diputado i ta deseá su persona tur klase di éksito pa den futuro.
