Tourism Corporation Bonaire (TCB) i e klup di futbòl PSV ta bini ku un akshon di gana úniko pa tantu poblashon lokal di Boneiru komo e fanátikonan di PSV na Hulanda. Esaki ta na interes di e kolaborashon entre PSV i Entidat Públiko Boneiru. Den e kolaborashon akí TCB ta entre otro enkargá ku promoshon i merkadeo.
Fanátikonan di PSV tin chèns di gana un biahe pa dos persona pa bai Boneiru. Na mes momentu habitantenan di nos isla tambe tin chèns di gana un biahe pa dos persona pa bishitá Eindhoven i e klup di futbòl PSV. E ganadónan lo biaha den luna di mart 2023 pa Eindhoven i Boneiru.
E akshon di gana ta ranka sali entrante 15 di novèmber 2022. Partisipantenan por registrá te ku 19 di desèmber 2022. Dia 9 di yanüari 2023 ta anunsiá e ganadónan via medionan sosial. Partisipantenan tin ku sigui página di Facebook i Instagram @Bonairetoerisme i @PSV i página di Facebook @TourismCorporationBonaire.
Pa mas informashon i pa registrá pa e akshon di gana, bishitá e wèpsait https://bonaireisland.com/nl/psv/
