Riba djaluna 4 di yüni, Entidat Públiko Boneiru, den kolaborashon ku e kadena hudisial, a organisá un enkuentro Kompas pa hóbennan ku ta konsiderá komo vulnerabel òf den riesgo pa motibu di ousensia eskolar duradero, abandono di skol i/òf kontakto ku hustisia. E enkuentro a tuma lugá na Jong Bonaire i a trese hóbennan, mayornan i profeshonalnan huntu pa trata e tema prevenshon di violensia ku arma di kandela bou di hóbennan.
E enkuentro Kompas su enfoke tabata pa duna perspektiva i krea un kaminda alternativo pa hóbennan ku ta den peliger pa slep drenta kriminalidat i violensia. Bou di e lema “For di vulnerabel pa perspektiva”, a papia ku e hóbennan i nan mayornan tokante responsabilidat, seguridat, posibilidatnan pa futuro i hasi eskohonan positivo.
Durante e reunion, Gezaghebber John Soliano a enkurashá i motivá e hóbennan pa hasi eskoho positivo pa nan futuro.“Nos por hasi hopi pa boso, pero e desishon final ta keda na boso tambe. Boso por skohe pa sigui e kaminda korekto,” asina Gezaghebber a bisa.
Ademas, dos persona ku eksperensia propio (drop-outs) i dos polis di bario a kompartí nan historia i eksperensianan personal ku e públiko. Durante esaki a pone atenshon riba e konsekuensianan di violensia i kriminalidat, pero tambe riba e importansia di guia, sosten i oportunidatnan pa kambio. Plenchi di Trabou a duna e hóbennan konseho tokante posibilidatnan di trabou i estudio durante e enkuentro Kompas.
Promé a papia ku e hóbennan i nan mayornan. Despues un tim multidisiplinario di kuido a bai den kombersashon ku esnan presente. E tim tabata presente pa ofresé yudansa i guia adekuá mesora na hóbennan ku mester di sosten. En total, bintidos hóben a registrá pa e trayekto akí. Durante e enkuentro Kompas, a kolektá dato di e hóbennan akí. Despues di e enkuentro, lo diskutí huntu ku e instansianan envolví, e siguiente pasonan pa sostené e hóbennan pa kibra patronchinan negativo i krea oportunidatnan nobo pa nan futuro.
Ku e maneho konhunto aki, Entidat Públiko Boneiru, direktorado Komunidat i Kuido, i e partnernan envolví - FORMA, SGB, Akseso, Zorg en Veiligheidshuis, KPCN (polis di bario) i Voogdijraad - ke kontribuí na prevenshon di violensia ku arma di kandela bou di hóbennan i invertí den un futuro mas sigur pa Boneiru.
