Alumnonan na Boneiru por kuminsá prepará atrobe pa un edishon nobo di Fiesta di Salú. E aña akí atrobe, tur alumno di skol básiko na Boneiru ta bai gosa di e evento ku ta promové importansia di salú na un manera dibertido i aksesibel. E aña akí GGD Bonaire / Salubridat Públiko, organisadó di Fiesta di Salú, ta pone atenshon spesial na edukashon. Muchanan no ta diskubrí solamente kon kome salú i moveshon ta kontribuí na nan bienestar, sino ta siña tambe mas tokante kon kuminda ta krese i di unda produktonan saludabel ta bini.
Diputado Silberie tambe tabata presente na apertura ofisial di Fiesta di Salú di e aña akí. E diputado huntu ku alumnonan a partisipá na e inisio festivo di e evento i a enfatisá importansia di atenshon pa un estilo di bida saludabel for di edat yòn.
Aña pasá a organisá Fiesta di Salú pa promé biaha na skolnan di Boneiru. E konsepto i e weganan konosí ku e superhéroenan Zula Pampuna, Bita Banana, Wòti Walnoot i Awasito ta bèk e aña akí tambe. E ekipo di Bon Salú ta yuda muchanan pa na un manera dibertido i ku nan por rekonosé, deskubrí opshonnan saludabel. Na mes momentu e evento ta haña algun elemento nobo, ku ta hasi e dia atrobe un eksperensiá ku sorpresa pa muchanan ku a partisipá aña pasá kaba.
Un parti spesial di e edishon akí ta atenshon na pampuna, konektá ku e superhéroe Zula Pampuna. Muchanan ta siña kon pampuna ta krese, dikon e ta saludabel i ta haña un mata bai kas kuné pa apliká loke nan a siña. Asina ta konektá siña i hasi ku otro. Tambe a agregá un stashon di kues nobo kaminda alumnonan na un manera dibertido por amplia nan konosementu tokante salú. Ademas na e stashon di awa infushoná ta dediká atenshon èkstra na e benefisionan di bebe awa. Aki alumnonan ta deskubrí kon awa ku fruta no solamente por ta saludabel, sino tambe sorprendentemente dushi.
E klousura festivo di Fiesta di Salú ta tuma lugá 1 di novèmber durante Cyclovia. Na esaki ta invitá henter komunidat boneriano pa eksperensiá e aktividatnan di Fiesta di Salú.
