Entidat Públiko Boneiru (EPB) ta hasi uso di funshonarionan intermediario pa konektá alumno, studiante, mayor i skol mihó ku otro. Durante un enkuentro di intervishon resientemente, funshonarionan intermediario a interkambiá eksperensia i diskutí kon nan por sostené alumno, studiante, mayor i skol ainda mas mihó.
E inisiativa a bini di Aliansa Oportunidat Igual, i direktorado di Komunidat i Kuido di EPB ta koordiná i ehekutá esaki den kolaborashon estrecho ku vários direktiva di skol i otro partnernan di kadena na Boneiru.
E funshonario intermediario ta traha huntu ku skolnan i partnernan den e sektor sosial pa detektá señal na tempu i buska sosten adekuá. Punto di salida ta ku kada mucha, independientemente di e sirkunstansianan den kua e ta lanta, ta haña oportunidat pa desaroyá su mes adekuadamente i ta eksitoso na skol. E funshonario intermediario ta forma un parti importante tambe di Maneho Seguridat Integral di gabinete di Gezaghèber.
Funshonarionan intermediario ta un punto di kontakto aksesibel pa alumno, studiante, mayor i skol. Nan ta skucha, krea konfiansa, mira unda yudansa ta nesesario, pasa esaki i referí na e yudansa korekto. Asina nan ta yuda fortifiká e konekshon entre kas, skol i otro partidonan enbolbí.
Durante e enkuentro di intervishon, diputado Silberie a bisa ku ta importante pa ta serka di siudadanonan i ta visibel pa nan. Segun e, mester skucha bon i tin bista pa e banda sosial di situashonnan: “Tras di kada petishon di ayudo tin un persona, un famia i un storia. P’esei skucha promé kiko e persona ei realmente mester, i despues numa mira kon nos sistemanan i organisashonnan por ofresé e sosten adekuá.”
Huntu nos ta hasi e diferensia. Bo tin pregunta òf bo ta mira ku un mucha mester di sosten adishonal? Tuma kontakto ku skol òf e funshonario intermediario, pasobra tur mucha meresé oportunidat pa krese i triunfá.
