Entidat Públiko Boneiru (EPB) a tuma desishon pa lanta un instituto di idioma pa Boneiru. E instituto akí lo kontribuí na ehekushon di un maneho di idioma multilingual i na fortalesé papiamentu den enseñansa, gobièrnu i komunidat.
Papiamentu ta mas ku djis un idioma pa papia ku otro. Via idioma ta pasa konosementu, historia, tradishon i kultura di generashon pa generashon. P’esei papiamentu tin un posishon spesial komo idioma unifikadó den komunidat boneriano.
Traha huntu na alfabetisashon na papiamentu
Den e akuerdonan intergubernamental pa papiamentu na Boneiru a stipulá un ambishon kla: for di 2030 ningun mucha no ta bandoná skol sin por lesa i skirbi na papiamentu. Muchanan no solamente mester por papia papiamentu, sino tambe lesa i skirbi esaki bon.
E instituto di idioma ta haña un ròl importante pa logra e ambishon akí. E instituto ta bai trese huntu i sostené konosementu i ekspertisio relashoná ku papiamentu. Asina skol, gobièrnu i otro organisashonnan por traha huntu mihó na maneho di idioma.
Un responsabilidat kompartí
Riba e pregunta ken ta responsabel pa e ambishon ku for di 2030 ningun mucha no ta bandoná skol sin por lesa i skirbi na papiamentu, e kontesta ta kla: henter komunidat.
Idioma no ta biba solamente na skol. Mayornan i welo- i welanan na kas ta pasa idioma, storia, tradishon i konosementu pa nan yunan i nietunan. Skolnan i dosentenan ta yuda muchanan siña lesa, skirbi, i papia bon. Organisashonnan sosial, gobièrnu i prensa tambe tin un ròl importante den promoshon di uso korekto di papiamentu i aplikashon konsistente di e ortografia ofisial. Asina idioma ta keda visibel i un parti natural di bida diario di komunidat boneriano.
EPB, gobièrnu di Reino i vários organisashon sosial ta traha huntu na e tarea akí.
Den un komunidat ku vários idioma, papiamentu ta keda e idioma ku ta unifiká hende. Bon enseñansa na papiamentu ta kontribuí na preservashon di idioma, un identidat fuerte i bon oportunidat pa muchanan desaroyá nan mes.
Ku lantamentu di e Instituto di Idioma ta pone un paso importante padilanti. Huntu nos ta pèrkurá pa kada mucha bandoná skol ku e abilidatnan pa papia, lesa i skirbi bon papiamentu.
