Ku hopi alegria entidat públiko Boneiru ta wak bèk riba un eksitoso Dia di Boneiru, kaminda e tema ‘Huntu Nos Ta Forma Un Komunidat’ a para sentral. E aña akí a marka un oportunidat spesial, kaminda henter nos komunidat a bini huntu pa selebrá e dia importante akí.
E selebrashon di Dia di Boneiru a konta ku un partisipashon enorme i gustosamente nos ke ekspresá nos sinsero gratitut na tur hende ku a kontribuí na éksito di e evento akí. E energia positivo i e solidaridat ku nos a eksperensiá, a enfatisá esensia di nos komunidat i a fortifiká esaki.
Durante di e festividatnan tabatin vários aktividat i evento ku a reflehá Boneiru su diversidat i unidat. Esaki a enserá presentashonnan kultural, kulminashonnan kulinario i inisiativanan edukativo ku a pone énfasis riba nos patrimonio kultural i nos historia riku.
Entidat públiko Boneiru ta wak padilanti den direkshon di kontinuashon di kolaborashonnan positivo i enbolbimentu di komunidat pa fortifiká nos bunita komunidat i laga esaki krese. Nos ta agradesido pa e sosten di tur habitante, bishitante i organisashon ku a kontribuí na e éksito di Dia di Boneiru 2023.
Huntu, ku enbolbimentu i determinashon, nos lo sigui edifiká un Boneiru próspero i harmonioso.
