Dia 3 di ougùstùs próksimo Entidat Públiko Boneiru ta tuma ofisialmente despedida di gezaghèber interino Reynolds ‘Nolly’ Oleana. Durante e periodo ku e tabata gezaghèber interino, Oleana a hasi un trabou ekselente, Boneiru henter tin masha apresio pa su dedikashon.
Riba 3 di ougùstùs 2024 John Soliano ta huramentá komo gezaghèber nobo di Boneiru. E seremonia akí ta tuma lugá durante un reunion spesial di Konseho Insular na Passangrahan. Por sigui e reunion akí via www.konsehoinsular.org i/o medionan sosial di OLB i di Konseho Insular.
Despues di e seremonia tur hende ta invitá pa un bríndis huntu ku nos gezaghèber nobo den kurá di Cocari na Rincon. E festividatnan ta tuma lugá for di 19:00 or te 21:00 or. Esaki ta un bunita oportunidat pa nos komunidat topa gezaghèber Soliano i brind’é un kaluroso bon biní.
