Entidat Públiko Boneiru ta lansa e kampaña di resiliensia ‘Ta prepará’. E kampaña ta enfoká riba e diferente riesgonan ku Boneiru por keda konfrontá kuné i e ta yuda nos habitantenan pa prepará nan mes mas mihó posibel pa posibel situashonnan di emergensia.
Ku ‘Ta prepará’ Entidat Públiko Boneiru ke enfatisá kon importante ta pa Boneiru komo komunidat ta prepará pa tur tipo di situashon. Un bon preparashon ta sòru pa nos habitantenan sa mas mihó kiko nan por hasi promé, durante i despues di un situashon di emergensia.
Komo parti di e kampaña mas amplio aki, na promé lugá ta dediká atenshon na e temporada di orkan, ku a kuminsá dia 1 di yüni 2026 i ku ta kana te ku 30 di novèmber 2026.
Entidat Públiko Boneiru ta hasi un yamada riba nos habitantenan pa tuma medida na tempu. Por pensa akí riba: krea un pakete di emergensia, warda dokumentunan importante na un lugá seif, kontrolá bo kas i hasi palabrashon bon kla ku famia, besiña i hende ku tin mester di yudansa adishonal.
“Un Boneiru bon prepará, ta un Boneiru mas fuerte. Ku e kampaña akí nos ta yuda nos habitantenan pa nan ta konsientemente prepará na un manera práktiko i na tempu pa e riesgonan ku por afektá nos isla,” segun Entidat Públiko Boneiru.
Den e periodo binidero via diferente kanal i medio di komunikashon, Entidat Públiko Boneiru ta bai kompartí informashon i tep tokante e temporada di orkan i otro riesgonan. Nos ta enkurashá habitantenan pa sigui e kanalnan ofisial di Entidat Públiko Boneiru i kompartí informashon ku famia, amigu i besiña.
Ta prepará. Prepará bo mes awe, pa mañan bo ta mas fuerte.
