Entidat Públiko Boneiru ta pone un paso importante pa sigui mehorá bienestar di habitantenan. Resientemente, durante un enkuentro di ‘kick-off’, direktorado di Komunidat i Kuido di Entidat Públiko Boneiru a kuminsá ku un investigashon tokante kalidat di bida i e nesesidatnan pa loke ta trata bibienda na Boneiru. E investigashon akí ta forma parti di e plan di programa “Trahando pa Prosperidat i Bienestar na Boneiru”. Tur partner di kadena den e área sosial a haña invitashon pa e enkuentro di kick-off akí.
Ku e investigashon akí Entidat Públiko Boneiru ke komprondé mas mihó kiko habitantenan tin mester pa na un manera agradabel biba i partisipá den komunidat. E resultadonan ta yuda Entidat Públiko Boneiru sinkronisá maneho i sosten mas mihó ku e nesesidatnan di nos hendenan na Boneiru.
Diputado Peter Silberie a habri e enkuentro i a aksentuá ku Entidat Públiko Boneiru ta komprometé su mes aktivamente pa un komunidat fuerte i salú na Boneiru. El a ekspresá su speransa ku e investigashon rápidamente lo akumulá datonan balioso. Ku e informashon akí Entidat Públiko Boneiru por komprondé i sostené gruponan vulnerabel mas mihó. E direktor di direktorado di Komunidat i Kuido, sr Gerold van Elshuis a indiká ku kolaborashon ta hunga un ròl importante den esaki, tantu den Entidat Públiko Boneiru komo ku e diferente ministerionan.
E ofisina di investigashon Het PON & Telos for di Tilburg ta hasi e investigashon. For di 23 te ku 27 di febrüari 2026 e preparashon pa e investigashon a tuma lugá. Durante e enkuentro di kick-off, Het PON & Telos a duna e entrevistadónan ku ta bai ehekutá e investigashon un treinen di trabou den vèlt.
E investigashon ta enfoká riba diferente grupo den komunidat. Nan ta papia ku partisipantenan na programanan sosial, nan miembronan di famia, ‘life coaches’, organisashonnan sosial i empleadonan di Entidat Públiko Boneiru. Di e manera akí Entidat Públiko Boneiru ta haña un bon bista di diferente eksperensia i nesesidat.
E investigashon ta konsistí di kuater paso:
Enkuentro di kick-off i treinen
Trabou den vèlt – febrüari te ku mei 2026
Análisis i raportahe – yüni te ku ougùstùs 2026
Presentashon di resultado – ougùstùs te ku sèptèmber 2026
E investigadónan ta wak e tópikonan ku ta importante pa prosperidat amplio. Pensa riba bienestar, bibienda, entrada, trabou i tempu liber, enseñansa, salú, kontakto sosial i siguridat. Ku e informashon akí Entidat Públiko Boneiru por traha den un forma mas dirigí riba maneho ku ta fortifiká kalidat di bida na Boneiru.
Durante e enkuentro di kick-off, sr Hyrick Clarenda a duna un presentashon tambe tokante un proyekto piloto pa guia spesialisá di kliente. Su empresa ta duna coaching na hende ku un limitashon intelektual leve. For di aña 2023 su empresa ta trahando riba un proyekto piloto, kaminda e partisipantenan por haña coaching i guia ku e meta pa bira mas independiente. E guia ta yuda nan partisipá mas mihó den komunidat.
E ‘life coach’-nan ta traha intensivamente ku e partisipantenan i nan ta ofresé tantu guia personal komo guia den grupo. E sosten ta fásilmente aksesibel i ta konektá ku nesesidatnan di e partisipantenan.
E proyekto ta mustra ku sosten dirigí por hasi diferensia. Durante e aña tras di lomba diferente partisipante a bira mas independiente. Un partisipante a logra un diploma na nivel di mbo-1, i un otro partisipante a kuminsá ku su propio negoshi.
Mas lat den e aña akí, direktorado di Komunidat i Kuido lo kompartí resultadonan di e investigashon ku komunidat boneriano.
