Entidat Públiko Boneiru (EPB) ta introdusí un maneho adaptá pa su empleadonan baha delantá ku penshun. Ku e areglo akí, ámtenarnan di EPB entre 64 i 60 aña di edat ku ta traha minimalmente 10 aña na gobièrnu ta haña posibilidat pa baha delantá, promé ku nan fecha real di penshun. Ta ofresé empleadonan mas yòn ku 60 aña tambe e posibilidat akí. E ora ei nan mester a akumulá porloménos 30 aña di servisio di kua minimalmente 10 aña na EPB.
Gobièrnu di Boneiru tin aktualmente 119 empleado riba 58 aña. Den e periodo ku a pasa a hiba kòmbersashon ku empleadonan ku ke hasi uso di e areglo pa baha delantá ku penshun i tambe a tuma lugá diferente seshon di informashon. For di e grupo ku ta bin na remarke a hasi un inventarisashon i a disidí pa introdusí un bahamentu den fase. E aña akí 27 ámtenar ta bai ku penshun delantá. Na 2023, 28 empleado lo hasi uso di e areglo i pa 2024 esaki ta 34 empleado.
No ta obligatorio
Diputado Hennyson Thielman, enkarga ku e kartera di Asuntunan di Personal: “E maneho pa baha delantá ku penshun ta forma un parti importante di revitalisashon di e aparato gubernamental na Boneiru. Hasi uso di e areglo no ta obligatorio, pero e ámtenarnan ku mi a papia kuné ta traha mas ku 40 aña pa EPB. Nan a duna di konosé ku awor nan ke usa nan konosimentu i eksperensia atkirí di un otro manera, manera por ehèmpel traha ku mucha. P’esei mes ta hopi bon pa nan, ku nos a introdusí e areglo akí.”
