Entidat Públiko Boneiru (EPB) aktualmente ta hañando pregunta di mayornan, tutornan i kuidadónan tokante e kompensashon pa artíkulo di skol i sèn di buki pa aña eskolar 2026-2027. P’esei EPB ta duna informashon tokante tratamentu di petishonnan, dokumentonan nesesario i e situashon aktual.
Ki dia ta trata un petishon?
Por evaluá un petishon ora a yena e formulario di petishon online kompletamente i a risibí tur dokumento nesesario.
E término pa kaba atendé un petishon kompleto ta seis siman. E término akí ta kuminsá for di e momentu ku a risibí tur dokumento nesesario.
Petishon no ta kompleto?
Si e petishon falta ún òf mas dokumento rekerí, ta konsiderá e petishon inkompleto. Den e kaso ei, EPB ta tuma kontakto ku e persona ku a hasi e petishon i ta indiká kua dokumento mester entregá ainda.
E petishon ta kompleto asina ku a risibí tur dokumento rekerí kompletamente i korektamente. For di e momentu ei, EPB ta kuminsá trata kontenido di esaki. E término di seis siman ta kuminsá konta tambe for di e momentu ei.
E tempu ku EPB ta warda riba e dokumentonan ku falta, no ta konta komo parti di e término di seis siman.
Dikon e dokumentonan akí ta nesesario?
EPB mester di e dokumentonan akí pa por evaluá e petishon korektamente. E dokumentonan ta duna informashon tokante entrada, situashon di famia i inskripshon na skol. A base di esakinan EPB por kontrolá si e persona ku hasi petishon ta kumpli ku e kondishonnan.
Situashon aktual
Por a hasi e petishon pa artíkulo di skol i sèn di buki for di 22 di yüli 2026. Te ku 18 di ougùstùs, EPB a risibí 409 petishon.
Di eseinan:
· a aprobá 129 petishon;
· a rechasá 6 petishon;
· no a trata 43 petishon pa motibu di petishon dòbel;
· 231 petishon ta den proseso ainda
Di e 129 petishonnan aprobá, mientrastantu ya a entregá 115 map ku bale (‘tegoedbonnen’). Serka mas o ménos 40 di e petishonnan ku aktualmente ta prosesando, falta dokumento.
EPB ta pone rekurso adishonal pa trata e petishonnan mas rápido posibel.
Bo a entregá un petishon kaba?
E ora ei bo no tin nodi di entregá un petishon nobo. Un petishon dòbel por kousa retraso.
A notifiká bo ku falta dokumento? Entregá e ora ei solamente e dokumentonan adishonal ku ta pidi.
Balides di e balenan
Por usa e balenan (‘tegoedbonnen’) ku a duna pa artíkulonan di skol te ku 31 di òktober 2026. Ta pidi esnan ku a hasi petishon i ku a haña nan map ku bale (‘tegoedbonnen’), pa usa esakinan na tempu.
Mas informashon
Pa mas informashon tokante e kompensashon pa artíkulo di skol i sèn pa buki, habitantenan por bishitá e wèpsait di EPB: https://bonairegov.com/pa/habitante/kompensashon-pa-artikulo-di-skol. Ei ta haña informashon tokante petishon pa artíkulonan di skol pa skol básiko, petishon pa sèn di buki pa mbo, e dokumentonan nesesario i datonan di kontakto.
Di djaluna te ku djaweps tin yudansa disponibel tambe via telefòn òf WhatsApp na (+599) 701 1055, di 09.00 te 12.00 i di 14.00 te 16.00. Por meil pregunta tambe na schoolbenodigdheden@bonairegov.com.
