Entidat Públiko Boneiru (EPB) via e departamento di Enseñansa Obligatorio (Leerplicht) a konstatá ku ainda tin mucha ku no ta inskribí na un skol, miéntras nan ta kai òf ta bai kai bou di e lei di enseñansa obligatorio.
Segun artíkulo 6 di Lei di Enseñansa Obligatorio BES, mayornan i kuidadónan ta obligá pa pèrkurá ku nan yu ta inskribí na un skol. Esaki ta konta pa muchanan ku ta kai kaba bou di e lei di enseñansa obligatorio, pero tambe pa muchanan ku durante e aña eskolar ta hasi 4 aña i for di e momentu ei mester por sigui enseñansa.
E departamento di Enseñansa Obligatorio tin komprenshon pa e situashon di e último aña eskolar, den kua tabatin un falta di lugá di enseñansa. Mientrastantu pa e siguiente aña eskolar tin sufisiente lugá disponibel atrobe. Esaki ta resultado di kolaborashon intensivo entre EPB, OCW Hulanda Karibense i direktivanan di skol. P’esei EPB ta hasi un yamada urgente riba mayornan i kuidadónan pa mas pronto posibel ainda inskribí nan yu na un skol, si esaki no a sosodé ainda.
E derecho riba enseñansa ta di gran importansia pa desaroyo di kada mucha. P’esei ta importante ku ta inskribí muchanan na tempu. Asina for di prinsipio di aña eskolar òf asina nan hasi 4 aña, nan por bai skol.
Ora mayornan òf kuidadónan no inskribí nan yu, e departamentu di Enseñansa Obligatorio por kuminsá ku un investigashon. Si mayornan no kumpli ku nan obligashon legal, esaki por tin konsekuensia. Mayornan ta kore e riesgo e ora ei ku ta tuma paso hurídiko kontra nan, manera un prosèsverbal òf un but.
P’esei EPB ta supliká mayornan i kuidadónan urgentemente pa asumí nan responsabilidat i inskribí nan yu mas rápido posibel na un skol.
Pa pregunta òf sosten, mayornan por tuma kontakto ku e departamento di Enseñansa Obligatorio via leerplicht@bonairegov.com.
