Dia 28 i 29 di mart 2025 Entidat Públiko Boneiru tabata presente na e Feria Nashonal di Karera den RAI na Amsterdam. Den e zona spesial “Werken in de Caribbean - Traha den Karibe”, empleadonan di entidat públiko Boneiru a representá nos isla, huntu ku vários otro dunadó di trabou di Boneiru i di otro islanan. E feria a brinda un oportunidat úniko pa informá interesadonan tokante biba i traha na Boneiru.
Durante e evento hopi studiante i profeshonal ku rais boneriano a pasa pa profundisá nan mes den e posibilidat pa un karera na nos isla. Pa studiante ku finalisá nan estudio, Boneiru ta ofresé vários oportunidat atraktivo pa hasi uso di nan konosementu pa desaroyo di nan isla. Profeshonalnan tambe ku ya kaba tin trabou, a haña un bon imágen di e vakaturanan i e posibilidatnan pa kresementu ku Entidat Públiko Boneiru tin pa ofresé. Empleadonan di Entidat Públiko Boneiru tabata presente pa konta tur kos tokante bida na Boneiru i e ròl importante ku profeshonalnan ku regresá por hunga den kresementu i desaroyo mas aleu di nos isla.
Jaedan Crestian, un studiante boneriano na Hulanda, a pone énfasis riba importansia di regresá i kontribuí na edifikashon di Boneiru: “Mi ta kere ta importante pa nos ku ta studiante bai Boneiru bèk despues di nos estudio pa nos por aportá na e desaroyo di nos isla, di nos kas. Nos mester di nos hendenan.”
Entidat Públiko Boneiru ta sigui komprometé su mes pa stimulá profeshonalnan talentoso i pashoná pa hasi uso di nan abilidatnan pa kresementu di nos isla.
