Entidat Públiko Boneiru durante dianan di fiesta ta duna sosten na famianan na nos isla. Tur mucha di 0 te ku 3 aña i tur alumno di skol básiko ta haña un bòn di regalo di $40,-. E famianan ku un entrada abou i ku ta hasi uso di areglonan manera kompensashon pa koriente, artíkulo di skol, sèn di buki di MBO, kontribushon hür partikular (BPV) òf otro tipo di sosten finansiero, ta risibí un bòn di kuminda di $200,-.
Kolegio Ehekutivo ta haña importante ku tur mucha ta haña oportunidat igual pa desaroyá nan mes i pa partisipá den komunidat. Nos muchanan meresé atenshon, amor i apresio i nos tin ku protehá nan kontra tèrmentu i eksklushon sosial.
Antisipando riba vários fasilidat pa mucha pa den futuro, manera e ‘Kindpas’ (un tarheta pa paga tur loke un mucha mester) i e ‘Kindgebonden budget’ (un kontribushon finansiero pa famianan ku tin yu), Entidat Públiko Boneiru ke sòru pa tur mucha, sin importá e situashon finansiero na kas, por haña un regalo durante e dianan di fiesta.
Banda di esaki Kolegio Ehekutivo ke yuda baha kosto di bida. E intenshon ta pa famianan, despues di paga nan gastunan fiho, por sobra mas òf ménos 30% di nan entrada. Esaki ta sòru pa mas trankilidat finansiero i ta yuda e famianan pa anda mas mihó ku gastunan inesperá i ku oumentonan di preis.
Kon ta entregá e bònnan
Ta entregá e bònnan di regalo pa mucha di 0 te 3 aña i e bònnan pa kuminda for di 15 di desèmber 2025.
Gerensia di skol ta entregá e bònnan di regalo pa alumnonan di skol básiko na skol mes.
Fecha i sitio
Periodo 1
15 i 17 di desèmber 2025 – 08:00 te 17:00 or
Fundashon Avanti, Plasa Chiku Goeloe, Antriol
16 i 18 di desèmber 2025 – 08:00 te 17:00 or
Jong Bonaire, Kaya Libertador Simon Bolivar 16
Periodo 2
5 te ku 15 di yanüari 2026 – 08:00 te 17:00 or
Jong Bonaire, Kaya Libertador Simon Bolivar 16
Periodo 3 (último oportunidat)
16 di yanüari te ku 16 di febrüari 2026 – 09:00 te 12:00 or
Direktorado di Komunidat i Kuido, Kaya Neerlandia 41
Dokumentunan nesesario
Pa e bòn di regalo pa mucha di 0 te 3 aña:
· Sédula bálido òf pasport bálido
· Buki di famia òf buki di kasamentu
· Ekstrakto (uittreksel) di registro sivil (prueba ku bo ta mayor òf kuidadó)
Pa e bòn di kuminda:
· Sédula bálido òf pasport bálido
Ora bo bin buska e bòn bo tin ku firma pa esaki.
Bo no por bin buska e bòn den periodo 1 òf 2? E ora ei for di 16 di yanüari 2026 bo por akudí na: Direktorado di Komunidat i Kuido, Kaya Neerlandia 41.
