Direktorado di Planifikashon i Desaroyo a kuminsá ku tratamentu aktivo di e petishonnan pa pèrmit di konstrukshon, ku den sierto kaso pa hopi tempu tabata wardando nan turno. E personanan ku e tempu ei a hasi un petishon, den e periodo binidero ta risibí un karta ku splikashon di e pasonan di kontinuashon den nan petishon.
Entidat Públiko Boneiru ta rekonosé ku durante e añanan tras di lomba a surgi un retraso den tratamentu di pèrmit di konstrukshon i pa esaki gobièrnu ta ofresé su sinsero diskulpa. Nos ta komprendé ku pa hopi habitante esaki a kondusí na insiguridat i frustrashon. Pa e motibu akí nos no ta solamente atendé ku e retrasonan aktual, pero nos ta aktivá medidanan interno sólido tambe pa fortifiká henter e proseso i pa evitá ripitishon den futuro. Un parti importante di esaki ta digitalisashon di nos sistema di traha. Di e manera akí nos no ke solamente traha mas rápido, pero tambe ku mas transparensia i ku mas enfoke riba kliente, di manera ku di awor en adelante por trata e petishonnan na un manera ku ta kana sin problema i na tempu.
Yamada na e personanan ku a hasi petishon
Ta importante pa personanan ku risibí un karta reakshoná na tempu i kaminda esaki ta nesesario entregá e dokumentunan ku falta. Solamente di e manera akí por trata e petishon na un manera kompletu. Ora ku no entregá e informashon pidí dentro di e término stipulá, por saka e petishon for di den tratamentu.
Ku e aserkamentu akí Entidat Públiko Boneiru ke restablesé klaridat i konfiansa den e proseso di pèrmit. Direktorado di Planifikashon i Desaroyo i su tim ta kla pa duna guia na e personanan ku a hasi petishon i trata nan petishonnan korektamente.
Mas informashon
Pa pregunta habitantenan por tuma kontakto via email: directie_ro@bonairegov.com òf via e wèpsait ofisial di Entidat Públiko Boneiru: www.bonairegov.com.
