Bou di guia di diputado Anjelica Cicilia di entidat públiko Boneiru a tuma lugá un eksitoso seshon di informashon entre gobièrnu di Boneiru i vários kompania di infrastruktura ku ta aktivo na nos isla. E meta di e seshon akí tabata pa sinkronisá e metanan i vishonnan di ámbos partido i pa sòru pa un kolaborashon sin difikultat den futuro proyektonan di infrastruktura.
Durante e seshon a papia ampliamente tokante e vishon riba término largu pa Boneiru. E Plan di Desaroyo Teritorial Boneiru ta data for di aña 2010. Un tempu kaminda Boneiru su populashon tabata konsistí di solamente 15.000 hende. E oumento di densifikashon ku apénas adaptashon na e infrastruktura prinsipal a sòru ku tin uso hopi mas intenso di nos kamindanan ku nos por a pensa. Importansia di un vishon renobá di struktura ku un plan adekuá di infrastruktura ta hunga un ròl krusial den futuro kresementu i desaroyo di nos isla.
Nan a papia tambe profundamente tokante e kantidat di medionan di produkshon pa kada proyekto, e kriterionan di selekshon, i e proseduranan di destaho. E tópikonan akí ta esensial pa sòru ku ta ehekutá e proyektonan den un forma efisiente i transparente, ku bista pa e standartnan di mas haltu. Tambe nan a para ketu na e Dekreto di Establesimentu i Aktividat BES ku ta kontené e reglanan di medio ambiente pa empresa. Kumplimentu ku esakinan ta esensial pa un mihó protekshon di nos naturalesa i medio ambiente.
Diputado Cicilia a hasi un yamada riba tur hende presente pa uni. ‘Komo asosiashon sektoral boso por sostené otro mas mihó. Tambe di e manera akí por tin kontakto i representashon hopi mas fásil entre e kompanianan di infrastruktura i entidat públiko Boneiru.’ Tambe el a papia ku e kompanianan tokante un ‘Code of Conduct – Kódigo di Kondukta’. El a para ketu na reglanan general di komportashon, manera tapamentu di trùk, i e importansia pa kaminda esaki ta posibel, yuda hasi nos isla limpi. ‘Imaginá boso mes ku kada kompania durante un dia pa luna boluntariamente lo yuda ku kolekshon di shushi gròf for di nos mondinan. E trùknan i otro ekiponan nesesario boso tin kaba. Kiko ta e impakto ku huntu nos lo por hasi?’
Ku e seshon akí entidat públiko Boneiru a pone un paso importante den direkshon di un kolaborashon strukturá i efisiente ku e kompanianan di infrastruktura, kaminda interes di Boneiru i su habitantenan ta bini na promé lugá.
