Un delegashon for di Hulanda lo ta presente na e enkuentro pa durante e enkuentro akí drenta den kòmbersashon ku habitantenan i tende nan opinion relashoná ku e museo nashonal tokante pasado di sklabitut. E mesun delegashon ta hasi bishitanan similar na nos islanan ruman i na Sürnam pa inventarisá kiko ta e kosnan ku mester tene kuenta kuné den kaso di un museo nashonal tokante pasado di sklabitut.
E intenshon ta pa habri e museo nashonal tokante pasado di sklabitut na aña 2028. Komo preparashon pa esaki na aña 2023 ta kuminsá kaba ku e trabounan nesesario, manera e bishita akí di e delegashon for di Hulanda. E delegashon ta deskribí e motibu pa nan bishita komo lo siguiente: “Meta di nos bishita ta pa bai den diálogo ku habitantenan di kada isla. Pa medio di hiba e kòmbersashonnan akí nos por skucha e ideanan ku e habitantenan tin tokante e museo. Asina nos ta spera di yega na un museo mas inklusivo posibel pa tur hende. Gustosamente nos ta inkluí e ideanan i deseonan di habitantenan di e islanan den nos plan. Esaki ta hasi ku e diálogo ku habitantenan di kada un di e islanan ta di importansia esensial.” E delegashon for di Hulanda ta konsistí di Peggy Brandon (kwartiermaker di e museo), Diana Landveld (direktor di direktorado di Enseñansa, Hubentut, Kuido i Diversidat na Munisipio Amsterdam), Irene van Renselaar (konsehero na Ministerio di Enseñansa, Kultura i Siensia) i John Leerdam (kwartiermaker rekoudashon di fondo i relashonnan polítiko).
