Awor ku temporada di áwaseru a kuminsá atrobe, ta importante pa eliminá lugá di brui di sangura pa evitá malesa manera dengue, chikungunya i zika. E Aedes aegypti, e sangura ku ta plama e malesanan akí, ta pone su webunan den ophetonan ku no ta tapá i ku tin awa di yobida ku ta para ketu aden. Manera tayer di outo, baki di plèstik, bòter, bleki i hèmber. Na kuminsamentu di e aña akí pa di promé biaha for di aña 2012, Boneiru tabatin un brote di dengue. Departamento di Salubridat Públiko ta hasi un yamada pa eliminá mas tantu lugá di brui di sangura posibel. Di e manera ei por evitá un brote nobo.
Durante e brote di kuminsamentu di e aña akí via un tèst na laboratorio a konstatá serka 301 hende ku nan tabatin dengue. E kantidat di hende kontagiá ku dengue probablemente tabata mas haltu. No tur hende ku kontagiá ku dengue, tin keho. I no tur hende ku tin keho, ta bai hasi tèst na laboratorio.
E sangura di dengue ta biba prinsipalmente den kas i kurá di hende. E sangura muhé ta pika hende pa chupa sanger. E sanger ta nesesario pa alimentá e webunan den su kurpa kuné. Despues e sangura ta buska opheto ku awa aden pa pone su webunan. E sangura muhé preferiblemente ta pone su webunan den ophetonan ku banda lizu i awa transparente.
Pa evitá un brote, bo por kontrolá regularmente si den òf rònt di bo kas tin ophetonan ku no ta tapá i ku tin awa aden. E konseho ta tambe pa sera baki òf barí ku awa di yobida bon pa sangura. Por hasi esaki ku un paña òf skrin kontra sangura. Hasi uso di kabuya òf elastik pa mara e paña.
Siudadanonan por evitá ku e sangura di dengue ta pika nan. Nan por hasi esaki pa medio di bista paña ku ta tapa nan kurpa bon den temporada di áwaseru, òf usa un produkto fuerte ku DEET pa kore ku sangura. Sòru pa bo kas ta liber di sangura. Pone skrin òf usa un ‘spray’ ku ta mata sangura. E sangura ku ta plama dengue, chikungunya òf zika, ta aktivo durante henter dia. Spesialmente mainta tempran òf den atardi. Drumi durante dia i tramèrdia i anochi bou di un muskitero.
Bo tin mester di ayudo òf konseho pa tratamentu di renbak òf barí di awa? E ora ei yama departamento di Salubridat Públiko via e number di telefòn 715 5324.
