Gezaghèber di entidat públiko Boneiru a tuma nota di reakshonnan preokupá relashoná ku ekspreshonnan ku segun personanan ku tabata presente, a keda hasí tokante e komunidat di LHBTQI+, durante un enkuentro públiko di organisashonnan di iglesia dia 11 di yanüari 2025. Gezaghèber di entidat públiko Boneiru a tende ku hendenan ta preokupá tokante ekspreshonnan relashoná ku e komunidat di LHBTQI+.
Derechonan fundamental i libertat di ekspreshon
Demonstrashon ta un parti esensial di nos derechonan fundamental, manera libertat di ekspreshon, libertat di religion i e derecho pa protestá. Gezaghèber ta aksentuá ku no tur ora e mester ta di akuerdo ku e mensahenan ku hende ta trese padilanti durante un demonstrashon. Tòg e ta haña ku ta di gran importansia ku na tur momentu esaki ta tuma lugá ku rèspèt pa otro.
Inklusividat na Boneiru
Gezaghèber ta haña importante ku tur hende ta sinti nan mes seif na Boneiru. El a bisa: “Komo tata di pueblo mi ta sòru pa tur hende sinti nan mes seif den nos komunidat.” E ta haña lamentabel ku tin algun habitante ku a sinti nan mes insigur, sin libertat òf diskriminá debí na e ekspreshonnan durante e enkuentro.
Konsulta ku outoridat
Despues ku gezaghèber a risibí sierto señalnan, el a deliberá tokante e insidente ku Ministerio Públiko i polis. Boneiru ta un komunidat diverso ku diferente opinion i konvikshon. Lei ta protehá e derecho pa kompartí bo konvikshonnan, pero tin límite. Ora ku surpasá e límitenan akí, esaki por tin konsekuensia.
Yamada pa Rèspèt i Diálogo
Gezaghèber ta haña balornan manera ekivalensia, rèspèt i inklusividat hopi importante pa Boneiru. E balornan akí ta den artíkulo 1 di nos Konstitushon. Boneiru ta un isla kaminda hende, no opstante sierto diferensianan, ta biba na pas ku otro. Pa e motibu akí gezaghèber ta hasi un yamada riba tur hende pa konservá e karakterístikanan akí i pa respetá otro. Esaki ta importante pa bienestar i desaroyo di nos isla. E ta spera ku organisashonnan i gruponan (sosial) ta bai den kòmbersashon ku otro i yega mas serka otro. Solamente huntu nos por traha pa logra un mihó Boneiru pa tur hende.
