For di 24 te ku 28 di mart Direktorado di Komunidat i Kuido di Entidat Públiko Boneiru, den kuadro di e Plan di Programa “Trahando pa Prosperidat i Bienestar di Boneiru”, a organisá un eksitoso seshon di trabou na Boneiru. For di e plan di programa a lanta diferente tim di tarea, entre otro e tim di tarea ‘Debe’. E tim di tarea ‘Debe’ ta konsistí di e konsehero di maneho di Entidat Públiko Boneiru, departamento di Trabou Sosial Finansa di Sentro Akseso, konseheronan di maneho di ministerio di Asuntunan Sosial i Empleo (SZW Hulanda Oropeo), i NVVK, e asosiashon di sektor di mas grandi pa ayudo na momentu di debe i servisio finansiero (for di aña 1932 na Hulanda Oropeo). Meta di e siman di trabou akí tabata pa ‘brainstorm’ tokante e metanan riba ‘término kòrtiku’, manera: yega na un módulo relashoná ku atmishon/registrashon, señalamentu tempran, stabilisashon i areglo di pago. Seguidamente a ‘brainstorm’ tambe tokante prosesonan di trabou pa guia finansiero i kolaborashon entre dunadónan di ayudo riba tereno finansiero i kreditornan.
Metanan
Riba término kòrtiku: Konbenio den kua a stipulá kolaborashon.
Riba término mediano: Regulashon (ordenansa insular)
Riba término largu: Legislashon, di manera ku e habitante ta haña oportunidat pa un futuro liber di debe.
Den luna di òktober 2024, NVVK a hasi un bishita di trabou na Boneiru. For di resultado di e investigashon di NVVK, a resultá ku debe ta surgi na Boneiru debí na lo siguiente: adaptashon, sobrebibensia, kompensashon i gastamentu di mas. Durante e siman di trabou akí a organisá tambe un seshon di trabou híbrido ku e suministradó di koriente Eneco, huntu ku e kreditornan.
Banda di esaki, relashoná ku guia finansiero di siudadanonan na Boneiru, departamento di Trabou Sosial Finansa di Sentro Akseso a presentá nan resultadonan eksitoso.
Ku un bista bèk riba un siman di trabou produktivo, e tim di tarea ‘Debe’ ta bai enfoká riba eksplorashon di solushonnan alternativo pa problemanan di debe, pa medio di plannan bon elaborá.
