Eksitoso promé Dia di Canon ta marka inisio di Canon di Boneiru

Dia 17 di mei e promé Dia di Canon a tuma lugá na Fontein. Tabata un bunita dia ku mas di 250 bishitante. E dia akí a forma e evento di apertura ofisial di Canon di Boneiru.

Canon di Boneiru ta un liña di tempu moderno ku ta duna un bista general di personanan, sitionan, artefaktonan i susesonan spesial i importante for di historia di Boneiru. Despues e Canon lo ta disponibel via un wèpsait.

Meta di e Canon ta pa kompartí historia di Boneiru na un manera simpel i aksesibel. Mester por usa e Canon den enseñansa tambe. Kada tópiko den e Canon nos ta yama un ‘bentana’. Huntu ku kada bentana ta bini un teksto kòrtiku ku informashon adishonal, manera buki, potrèt, video i podcast tokante e tópiko.

E Canon ta mustra nos kon pasado, presente i futuro ta konektá ku otro.

Pa e motibu akí nos a skohe Fontein komo sitio pa e promé Dia di Canon di Boneiru. Ántes Fontein tabata importante pa e poblashon indígena i awe te ainda e tin un nifikashon spesial pa Boneiru.

Nos ta traha e Canon huntu ku ekspertonan lokal i komunidat. Durante e Dia di Canon, bishitantenan por a proponé tópiko pa e Canon. Hopi hende a hasi uso di esaki i nan a skirbi nan ideanan riba e bòrchi di Canon.

Dentro di poko nos ta pone e proposishonnan akí riba wèpsait di Entidat Públiko Boneiru. Despues komunidat por vota pa e tópikonan ku nan ta haña esunnan di mas importante pa e promé 30 bentananan di e Canon. Na fin di aña 2028 nos ta publiká e prome bentananan akí.

Den futuro por añadí bentana nobo na e Canon. Tambe ta posibel pa adaptá bentana eksistente ora investigashon nobo produsí informashon nobo òf ora kualke suseso importante tuma lugá ku meresé un lugá den e Canon. E Canon ta sigui desaroyá su mes pues. Historia nunka no ta para ketu i ta sigui krese ku storianan i konosementu nobo. Di e manera akí Boneiru su storia ta keda konservá pa siguiente generashonnan.

Durante e Dia di Canon nos a organisá diferente aktividat kultural históriko tambe. Pa esaki kordialmente nos ke gradisí nos partnernan di kolaborashon: FuHiKuBo pa e rekoridonan kultural históriko, Adelina Piard i Alex Plantijn (Mangazina di Rei) pa e tayer di yerba medisinal, Ghislaine Monte pa e tayer di pigmento natural i Dorian Crespo Gómez pa e tayer di traha habon di klei.

Bo mes tin fitbèk tokante e Dia di Canon? Òf bo ke yuda skirbi e Canon òf organisá aktividat kultural i históriko? E ora ei manda un email na daudi.cijntje@bonairegov.com.

Entidat Públiko Boneiru ta koordiná e proyekto akí ku ta forma parti di e Agènda di Akshon Pasado di Sklabitut Boneiru.