Riba djamars 23 di sèptèmber 2025 a tuma lugá e apertura festivo di e promé Fiesta di Salú ku Salubridat Públiko (GGD Bonaire) a organisá. E evento na Rayo di Solo / Strea Briante tabata kompletamente den signo di kuminda saludabel, moveshon i bebementu di awa, ku un programa inspirativo pa mucha di skol básiko. Gezaghèber John Soliano i diputado Peter Silberie a habri e seremonia, i den nan diskursonan nan a pone énfasis riba importansia di salú i sentido komunitario. Gezaghèber Soliano, diputado Silberie i dos alumno di e skol básiko a marka e inisio ofisial di e evento, durante un momentu simbóliko di kòrtamentu di sinta na e fasilidat nobo pa bebe awa.
E muchanan a sera konosí ku Bon Salú Squad, kuater superhéroe kolorido ku ta duna bida na diferente eskoho salú:
- Wòti Walnoot (eskoho sabí i enfoke),
- Bita Banana (energia i hustisia),
- Zula Pampuna (kuido, konektividat i orguyo),
- Awasito (awa, balansa i goso den bida).
Pa medio di kombiná siñamentu i kultura na un manera di wega, e superhéroenan a mustra ku salú ta un forsa ku kada mucha tin den su mes.
Fiesta di Salú ta pa tur alumno di skol básiko. Durante e 3 simannan tras di lomba Fiesta di Salú a tuma lugá na tur skol básiko na nos isla. E siman akí Fiesta di Salú ta tuma lugá na tur departamento di Komunidat di Skol Boneriano – SGB. Kordialmente GGD Bonaire ta invitá tur mucha i tur mayor pa bin disfrutá di e Fiesta di Salú públiko riba djadumingu 2 di novèmber 2025 durante e evento di Cyclovia den sentro di siudat na Playa.
Kids in the News
Un parti spesial di Fiesta di Salú ta Kids in the News, kaminda huntu muchanan ta krea algun item kòrtiku di notisia tokante kiko nan ta pasa ‘den i siña. Pa medio di entrevistá otro i kompartí eksperensia, e muchanan ta papia ku otro tokante salú i estilo di biba. Di e manera akí nan no ta haña e mensahe solamente di adultonan, pero prinsipalmente di mucha di nan edat – na un manera ku ta serka di nan i rekonosibel.
E evento ta konektá perfektamente ku e kompromiso mas amplio di GGD Bonaire pa haña konosementu di e ambiente ku nos muchanan ta lanta ‘den. Banda di e aktividatnan festivo den e último lunanan di e aña akí tin tambe e Kindmonitor 2025, un lista di pregunta anónimo pa mayornan i kuidadónan di mucha di 0 pa 12 aña. E resultadonan ta duna informashon balioso tokante kon nos muchanan ta lanta na Boneiru i kua ta e sosten ku famianan tin mester. Ku esaki nan ta forma un base importante pa sinkronisá inisiativanan manera Fiesta di Salú i otro programanan di salubridat mas mihó ainda ku e práktika diario.
‘Fiesta di Salú a mustra kon músika, wega i edukashon huntu por sòru pa un mensahe fuerte,’ segun Anesty Pikeur, kordinadó di Bon Salú. ‘E muchanan no solamente a pasa prèt, pero nan a eksperensiá tambe ku eskoho salú ta plasentero i faktibel. Ku e konosementu ku e Kindmonitor ta proveé, nos ta sòru pa nos pone e énfasisnan korekto pa fortifiká salú di nos muchanan na Boneiru na un manera duradero.’
