E di dos edishon di SKAL Jam Session, ku a tuma lugá riba djaluna 16 di yüni, a resultá un gran éksito. Tur hende tabata kontentu i a disfrutá di un anochi di inspirashon, tayer i alegria musikal. E seshon tabata dirigí pa e maestro Wesley “Wèwè” Sint Jago i tabata dediká na e músika traditional pa e selebrashon kultural di San Juan i San Pedro. Durante e edishon spesial aki, Wèwè no solamente a mustra su talento musikal, pero tambe a duna un tayer edukativo tokante orígen i importansia di e kantikanan tradishonal di nos fiestanan. El a splika kiko ta “den seku” – esta músika akústiko ku ta karakterisá e fiesta akí i e papel importante ku e instrumento kuarta ta hunga un ròl den ritmo i struktura di e kantikanan.
Un splikashon di historia musikal
Wèwè a konta tokante bida i bèkgrount di diferente kantika konosí ku ta forma parti di e selebrashon di San Juan i San Pedro. Hopi kantika ta nasé for di un evento spesífiko òf un persona, i ta konta su historia den forma musikal. Wèwè i su grupo di músiko a demostrá kon bo mester toka e kantika i kua ta e instrumentunan esensial pa krea e harmonia original.
Interkambio i edukashon
E anochi tabata mas ku un seshon di músika. E tabata un momentu di partisipashon aktivo. Tur hende a haña un palito pa por a toka huntu ku e banda. Wèwè a splika kon batimentu di man tambe por sirbi komo kontribushon musikal. Un dato interesante i alabes chistoso ta: durante San Juan i San Pedro, bebida ta solamente pa e músikonan i kantantenan – si bo no ta un di nan, no tin “beter pa tokadó”!
Huntu nos ta siña i krea
SKAL Jam Session ta un plataforma pa músikonan di tur nivel i tur edat – for di profeshonal te turista, for di hubentut te hende grandi. Un grupo di studiante di kuarta tabata presente i nan a siña hopi. Tambe tabatin kantante, amante di músika i te asta hende ku simpelmente a bini pa pasa un rato agradabel.
Ku bista pa futuro
Entrenadó di Kultura, Segni Bernardina, a kompartí e vishon di gobièrnu pa forma un skol nashonal di músika na Boneiru, kaminda nos mes músika lokal ta asumí un ròl prinsipal. El a lansa un yamada na músikonan lokal ku tin pashon i kapasidat pa duna lès of tayer, pa yuda forma e futuro musikal di nos hóbennan. E team di SKAL ke gradisí tur hende ku a tuma parti na e di dos edishon di Jam Session. E ideanan i komentarionan ku a bini dilanti, lo sirbi komo guia pa sigui traha riba desaroyo di e kampo kultural di Boneiru.
Próksimo seshon: Mark’é riba bo kalènder – 14 di yüli 2025 ta e di tres edishon di SKAL Jam Session!
