Gezaghèber di entidat públiko Boneiru

Sekretario di estado pa Asuntunan Interno i Relashon den Reino ta invitá personanan interesá pa solisitá pa e funshon di gezaghèber di entidat públiko Boneiru (alrededor di 24.090 habitante).

Proseso di nombramentu

Ta nombra e gezaghèber pa medio di Dekreto Real riba proposishon di e Sekretario di estado di Asuntunan Interno i Relashon den Reino pa un periodo di seis aña. E Representante di Reino (suplente) pa entidatnan públiko Boneiru, Sint Eustatius i Saba ta responsabel pa e prosedura di reklutamentu i selekshon.

E Representante di Reino (suplente) a yega huntu ku konseho insular di entidat públiko Boneiru na un deskripshon di profil ku lo usa ora di selektá kandidato.

Por konsultá e deskripshon di profil digitalmente riba https://www.rijksdienstcn.com/vacatures. Por pidi e deskripshon di profil tambe via e-mail serka sekretariado di e Representante di Reino (suplente) via e adrès di e-mail: gezaghebberbonaire@rijksdienstcn.com.

Un ‘assessment’ por forma parti di e prosedura, i su intenshon ta pa suministrá e Representante di Reino ku informashon komplementario ora di formulá su rekomendashon.

Promé ku hasi e proposishon, riba enkargo di ministerio di Asuntunan Interno i Relashon den Reino, lo ‘screen’ e kandidato proponé. E ‘screening’ lo konsistí di buskamentu di referensia serka AIVD i un investigashon fiskal.

Asuntunan relashoná ku posishon hurídiko

Salario di e gezaghèber ta suma USD 106.950 pa aña. Pa informashon adishonal al respekto i otro asuntunan relashoná ku posishon hurídiko di e gezaghèber, ta referí na e ‘Rechtspositiebesluit politieke gezagdragers BES’ (ku por konsultá ònlain).

Término di solisitut

Si bo kier bini na remarke pa e funshon, bo ta invitá pa hasi esaki konosí pa mas tardá, 24 di yüli. Bo mester dirigí bo solisitut na Su Mahestat Rei. Ta supliká bo pa manda un karta di solisitut firmá ku bo cv i un pasfoto resien. Preferiblemente manda bo solisitut di forma digital pa gezaghebberbonaire@rijksdienstcn.com. Si bo ta deseá hasié, bo por manda e solisitut tambe pa medio di pòst registrá pa e Representante di Reino (suplente). Por hasi esei, menshonando komo indikashon “na atenshon di Representante di Reino” i “Konfidensial” riba e ènvelòp. E adrès ta pòstbùs 338, Boneiru, Hulanda Karibense. Bo ta risibí denter di kuater dia di trabou un konfirmashon por eskrito di tantu un solisitut via e-mail komo via pòst.

Prosesamentu di dato personal

Pa e selekshon ta prosesá datonan personal, inkluyendo datonan hudisial. Pa prosesamentu di datonan hudisial ta pidi solisitante pa firma un deklarashon di konsentimentu ku e ta risibí despues ku risibí su cv i karta di solisitut. Pa bin na remarke pa nombramentu akseso na datonan hudisial ta rekerí.

E prosesamentu ta tuma lugá konforme e prosedura den e Lei entidatnan públiko Boneiru, Sint Eustatius i Saba i regulashon basá riba esei. Ta warda e datonan konforme e términonan legal.

Kontakto

Den kaso ku eventualmente tin pregunta tokante e prosedura òf funshon, bo por tuma kontakto telefónikamente ku sekretariado di Representante di Reino via gezaghebberbonaire@rijksdienstcn.com òf via +599 715 8304.

* E espektativa ta ku konseho insular di Boneiru pronto lo bolbe hasi un petishon pa subi kalifikashon na klase 5 pa e periodo aki i e siguiente. Si honra e petishon aki, e salario di gezaghèber tambe lo subi na USD 119.914.

Teksto di perfil di gezaghebber di Boneiru

1. Boneiru

Boneiru ta un isla ku un naturalesa úniko den Laman Karibe. Un isla ku tin e e parke nashonal di mas grandi di Hulanda Karibense: Washington Slagbaai. Un isla konosí pa e rikesa natural di e laman ku ta rondoná Boneiru.

Un isla ku un kultura riku i orguyoso. Un isla kaminda pasado te ku awendia ainda ta tangibel, palpabel i visibel i kaminda na mes momentu ta wak futuro ku un bista skèrpi.

Un isla den desaroyo ku a krese fuertemente e último añanan, tantu na kantidat di habitante komo pa loke ta trata aktividat turístiko.

2. Retonan pa Boneiru

Dor di e kresementu di Boneiru, e isla ta hañ’é konfrontá ku algun reto riba tantu área sosial, kultural komo físiko. Guia e kresementu (ku a tuma lugá kaba) den bon direkshon e añanan benidero ta un reto importante.

Ounke ku e ambishon i retonan na Boneiru ta grandi, e poder di ehekushon na e isla ta limitá. Retonan importante pa e isla ta, fortalesé e poder di ehekushon i mantené e ambishonnan den balansa ku e poder di ehekushon eksistente.

3. Kompetensianan prinsipal di e perfil

Entidat Públiko Boneiru i e retonan ku Boneiru ta enfrentá, ta rekerí un gezaghebber ku un perfil kla:

Ta hasi konekshon:

E gezaghebber ta trese konekshon den komunidat di Boneiru i ta resolvé diferensianan entre gruponan pa yega na lasonan di kooperashon. Di e gezaghebber ta deseá enfátikamente ku e ta resolvé kontradikshonnan i ta trese partidonan huntu ku rèspèt pa e ròl di kada ken.

Independiente:

E gezaghebber ta aktua neutral, tin outoridat i ta un punto di kontakto pa tur partido i hende na Boneiru. E gezaghebber ta aksesibel, e tin un predominio natural i un aktitut ku ta tene sufisiente distansia di interesadonan. Na mes momentu e gezaghebber ta brinda tambe espasio na e kampo polítiko, kaminda esei ta nesesario.

Rekonosibel:

E gezaghebber ta konsiente di e situashon (polítiko gubernamental) i ta aktua di akuerdo. E gezaghebber ta rekonosibel, sin importá e diferente ròlnan ku e gezaghebber tin, inkluyendo tambe esun di tata/mama di siudadano òf mènedjer di krísis. Den e ròl di presidente di konseho insular i kolegio ehekutivo, ta rekonosé e gezaghebber komo un vigilante di proseso independiente. E gezaghebber ta respetá den esaki e ròl polítiko i gubernamental di e frakshonnan den konseho insular i di e diputadonan.

Íntegro:

E gezaghebber ta aktua kla i transparente konforme norma- i balornan generalmente aseptá. E gezaghebber ta tene e kuadro- i proseduranan legal skèrpi na bista. E gezaghebber tin un kompas moral bon desaroyá, tin un funshon ehemplar i ta propagá konsiensia di integridat. E gezaghebber no tin miedu pa hala atenshon di otronan riba esaki a base di e diferente ròlnan, den kolegio ehekutivo, konseho insular, e organisashon- òf otro partidonan ku ta bin na remarke pa esaki.

Por resistí strès:

E gezaghebber ta aktua efektivamente bou di preshon i durante situashonnan di krísis, ta lusi trankilidat i konfiansa.

4. Espektativanan tokante ehersisio di e ròl

E gezaghebber komo tata/mama di siudadanonan

• Ta embolbí ku loke ta biba na Boneiru.
• Ta presente na susesonan ku ta importante na e isla.
• Ta aktua neutral ku tur partido, ta independiente i e gezaghebber ta di i t’ei pa tur hende.

E gezaghebber komo presidente di konseho insular

• Ta guia e debate den konseho insular i ta fasilitá bon tomo di desishon ku rèspèt pa e ròl polítiko di e miembronan den konseho insular i di e diputadonan.
• Ta un profeshonal kompetente. E gezaghebber por ehèmpel ta bon na altura di lei-, prosedura- i reglanan, kon pa guia reunion di konseho insular òf ta dispuesto pa profundisá su mes den eseinan i pa aseptá sosten.
• Tin un bon antèna pa diferente interes i opinion den konseho insular i pa e relashonnan mutuo (humano i polítiko).
• Tin ròl importante komo vigilante di integridat.

E gezaghebber komo presidente di kolegio ehekutivo

• Ta guia e kolegio komo tim i ta fasilitá bon tomo di desishon.  
• Ta profeshonal i kompetente. E gezaghebber por ehèmpel ta bon na altura di lei-, prosedura- i reglanan ku tin mester pa tomo di desishon den e Entidat Públiko.
• Den esei e ta respetá responsabilidat di kada ken i ta duna espasio na diputadonan pa ehekutá nan ròl gubernamental i sosial.
• Ta pèrkurá pa unidat di maneho i ta hunga un papel di konekshon.

E gezaghebber komo esun enkargá ku e kartera di órden públiko

• Por kontra krísis i ta desisivo.
• De mustra kombibensia ku víktima-, bisiña-, dunadónan di ayudo i eventual boluntarionan embolbí ora di kalamidat.

5. Demas puntonan di atenshon

E  gezaghebber mester tin un konekshon sosial kaba ku Boneiru.

E gezaghebber mester dominá tantu hulandes komo papiamentu perfektamente, tantu verbal komo por eskrito. Konosementu di spañó i ingles ta ademas un bentaha.

Boneiru ta parti di Hulanda Karibense. Konosementu di e region karibense ta un kondishon esensial importante i e gezaghebber ta sigui desaroyonan relevante di e region ku ta importante pa Bonaire.

Eksigensia ta ku e gezaghebber nobo tin su ofisina na Boneiru i, si esei ta aplikabel, pues mester establesé su mes mas pronto posibel despues di su nombramentu na Boneiru.

E kompetensia- i abilidatnan ariba menshoná ta forma e base pa e kombersashonnan di resonansia anual entre konseho insular i e gezaghebber.

Ademas tin algun eksigensia legal a base di e lei entidatnan públiko BES, entre nan: Nashonalidat hulandes (art. 75); Funshonnan adishonal (art. 79); Inkompatibilidatnan (art. 80 i 82) i domisilio real na Boneiru (art. 85).