Biblioteka Públiko Boneiru a klousurá e ‘Dianan nashonal di lesamentu pa otro’ ku un desayuno i naturalmente lesamentu, pa e muchanan ku ta bai krèsh ‘Huntu nos ta progresá’.
Boluntario Sharnise Alexander tabatin e honor pa konta e último kuenta di e seri di lesamentu durante e ‘Dianan Nashonal di lesa pa otro’ ku a kuminsá 26 di yanüari. Sharnise Alexander a sa di kapta atenshon di e muchanan ku e buki ‘Het eiland van Olifant’ skirbí pa Leo Timmers.
E ‘Dianan nashonal di lesa pa otro’ ta pa stimulá spesialmente mayornan lesa huntu ku nan yunan. E enfoke ta riba muchanan di 0 pa 3 aña ku no por lesa nan mes ainda. Pa kada bes lesa un teksto ku e muchanan, ta duna e chikínan amor pa lesamentu. Biblioteka Públiko Boneiru kier a gradisí tur boluntario ku a yuda pa a realisá e proyekto akí.
