Entidat Públiko Boneiru i Selibon ta seriamente preokupá tokante oumento di dùmpmentu ilegal di shushi rònt di Lac i Punta Calbas. Na vários sitio resientemente a topa ku shushi gròf i shushi doméstiko, asta sobrá kompleto di fiesta. E polushon akí no ta hasi daño solamente na nos naturalesa i nos bestianan, entre otro nos flamingo, pero tambe na e imágen ku Boneiru tin komo destinashon turístiko i na e ambiente di biba di nos habitantenan.
Na Punta Kalbas e situashon ta èkstra preokupante: banda di e kònteinernan di shushi ku nan a pone einan, tin un kantidat grandi di shushí tirá na suela. Tambe kantu di Kaminda Sorobon tin hopi shushi bentá.
Entidat Públiko Boneiru i Selibon ta enfatisá ku dùmpmentu ilegal di shushi ta kastigabel. Personanan ku kometé violashon di e lei akí ta riska di haña but haltu. Durante e akshonnan di limpiesa nan ta investigá e datonan ku nan topa den e shushi pa identifiká e malechor.
‘E komportashon akí ta inakseptabel. Boneiru ta nos isla i nos responsabilidat konhunto. Esun ku tira shushi afó den forma ilegal, ta afektá nos naturalesa i siguridat i habitabilidat di nos tur,’ segun Direktorado di Supervishon i Mantenshon di Lei.
Mas pronto posibel Selibon ta bai limpia e sitionan en kestion pa evitá mas plamamentu di e shushi. Na mes momentu nan ta konsiderando medidanan adishonal, manera seramentu di e kamindanan ku ta bai e sitionan konosí di dùmp shushi.
