Riba konseho di departamento di Salubridat Públiko, SP, pa siguridat dos klas a bai den karentena pa motibu ku algun alumno ta kontagiá ku e vírùs di corona. Ta trata di alumnonan ku keho leve na un skol básiko i un skol sekundario. E alumnonan ta bai di 2 te ku 7 di sèptèmber 2021 den karentena pa e skolnan ta seif i evitá ku e vírùs ta plama. Esaki a sosodé segun reglanan ku SP a stipulá den pasado huntu ku skolnan pa den kaso ku tin kontagio na skol.
A informá tur mayor di e alumnonan ku mester a bai den karentena na tempu. SP ta sigui e alumnonan ku awor ta den karentena di aserka. Ta tèst nan tur tambe promé ku nan por bai skol bèk atrobe. Den un deklarashon, SP ta laga sa ku por a spera ku alumnonan lo a kontagiá. ,,Ta un echo ku e vírùs di corona ta na Boneiru. Awor ku skol a kuminsá atrobe, nos ta mira ku einan tambe tin kontagio. Nos a hasi investigashon ekstenso i a disidí ku e alumnonan di e dos klasnan ta bai den karentena,” asina dòkter Loes Jaspers di departamento di SP a deklará.
Jaspers ta enfatisá ku mayornan no mester preokupá ku seguridat na skol. ,,No tin motibu pa tene alumnonan di otro klasnan na kas. Nos ta sigui e situashon di aserka, mayornan por konta ku nos ta intervení i tuma medida si ta nesesario.” E dòkter ta hasi un yamada na mayornan i tutornan di muchanan den e edat di 12 te 18 aña pa laga bakuná e hóbennan. Esei por e luna akí riba djasabranan 4, 11, 18, i 25 di sèptèmber na Kompleho Deportivo Jorge Nicolaas di 09:00 – 14:00 or. Na prinsipio di e aña eskolar nobo SP a kuminsá ku e kampaña BANSKOLBÈK#BON BAKUNÁ pa hóbennan.
