![[Translate to Papiamento:]](/fileadmin/_processed_/4/7/csm_Prik_d3ca1e34ac.png "[Translate to Papiamento:]")
Dia 9 i 16 di novèmber 2024 departamento di Salubridat Públiko i e dòkternan di kas ta organisá dos dia èkstra pa pasa angua. Hende di 60 aña bai ariba ku ke pasa e angua kontra grip, e angua kontra corona òf tur dos angua por akudí. Riba e dos dianan akí por pasa e angua(nan) sin sita for di 09:00 or – 13:00 or na e edifisio riba e tereno banda di Telbo, Kaya Libertador Simon Bolivar 8 na Playa. E anguanan ta intenshoná tambe pa hende bou di 60 aña ku tin por ehèmpel diabétis, malesa di kurason i pulmon, preshon haltu i sobrepeso.
Den luna di òktober e dòkternan di kas i departamento di Salubridat Públiko a organisá dos dia di pasa angua riba 19 i 26 di òktober na Jong Bonaire. E dos dianan akí tabata asina bon bishitá ku departamento di Salubridat Públiko i e dòkternan di kas a disidí pa organisá dos dia di pasa angua den luna di novèmber tambe. Ta posibel tambe pa pasa e angua kontra grip i e angua kontra corona serka bo dòkter di kas. Pa un bista general di esaki, wak riba www.bonairegov.com/angua.
Hende ku pa motibu di un malesa ta keda henter dia riba kama, por pasa angua na kas. Via e number grátis 0800 0800 nan por traha un sita pa pasa angua na kas. Via 0800 0800 ta posibel tambe pa hasi pregunta tokante e angua kontra grip i e angua kontra corona.
