Gezaghèber di entidat públiko Boneiru ta anunsiá ku tiendanan den sentro di siudat i den Parke Wilhelmina, ku ta enfoká riba benta di artíkulo turístiko, tin mag di ta habrí riba Dia di Pasku di Nasementu (25 di desèmber 2024) entre 09:00 or i 20:00 or.
Konforme e dekreto insular di 3 di desèmber 2004 (A.B. 2004, no. 25) ta prohibí pa tienda ta habrí riba Bièrnè Santu, Pasku di Resurekshon i Pasku di Nasementu, ku eksepshon di:
- Botika públiko (pa remedi i asesorio médiko);
- Tienda i empresa ku un pèrmit obligatorio i ku ta kai bou di e Ordenansa di Bibida i Hóreka;
- Tienda den hotèl i na aeropuerto, òf pòmp di gasolin;
- Tienda ku ta enfoká riba merkansia spesífiko, manera paña di rou, kombustibel, piesa pa motor, pan, lechi, pan i karni fresku.
Gezaghèber a disidi ku e prohibishon general riba Dia di Pasku di Nasementu 2024 no ta konta pa tienda den sentro di siudat i den Parke Wilhelmina ku ta bende artíkulo turístiko. Gezaghèber a tuma e desishon akí ku bista riba yegada di un barku krusero riba e dia akí i e fluho di bishitante ku nos ta spera. E dispensashon ta konta únikamente riba djárason 25 di desèmber 2024, for di 09:00 or te 20:00 or i e ta limitá na tiendanan ku ta enfoká spesífikamente riba produktonan turístiko. Tur otro tienda ta sigui kai bou di e prohibishon regular.
Ku e medida akí nos ta kumpli ku nesesidat di e turistanan ku ta bishitá Boneiru riba e dia akí, miéntras nos ta sostené interes ekonómiko di nos isla.
