Diskurso Gezaghebber John Soliano tokante situashon di seguridat na Boneiru

Kerido pueblo, último lunanan, mi a nota un inkietut kresiente bou di nos habitantenan tokante e situashon di siguridat riba nos isla. A konsekuensia di diferente insidente, manera atrako ku uso di violensia i arma di kandela, violensia riba kancha di deporte i un falta di rèspèt pa regla en general, mas i mas habitante ta eksperensiá un sintimentu di inseguridat. Hopi no ta rekonosé e Boneiru di antes mas: E sosiedat kaminda balornan manera rèspèt, honestidat i humildat tabata nos fundeshi. Komo gezaghebber, tata di pueblo, i mas ku tur kos, komo suidadano Boneriano, mi ke ta bon kla: violensia i krimen no ta aseptabel i no ta pertensé riba nos isla!

Mi ta komprondé e preokupashonnan ku ta biba den nos komunidat tokante e situashon di siguridat. E insidentenan resien ta serio, i ta afektá nos sintimentu kolektivo di seguridat. Ademas, sifranan di kriminalidat a bin ta mustra un kresementu di e kantidat di insidentenan ku violensia ya pa algun aña kaba. En partikular, e kantidat di sospechosonan ku ta hóben ta alarmante. Apesar di e puntonan di preokupashon aki, mi ta gradisido na e empleadonan den e kadena hudisial ku ta trahando duru pa mantené nos estado di derecho i órden públiko i mi ke enkurashánan pa sigui hasi esaki. Polis i otro partnernan den kadena hudisial ta hasi un esfuerso kontinuo pa identifiká esnan ku hasi nan mes kulpabel na aktonan di violensia i trese nan na hustisia. Ya kaba e esfuersonan aki a duna fruta, ku aresto di sospechosonan i kasonan penal andando den korte. Esaki ta demostrá ku krímen no ta paga.

Mas aleu mi a tuma diferente medida den e último lunanan pa kontrolá e situashon di seguridat mas mihó. Mi a stipulá áreanan di riesgo di seguridat. Den e áreanan aki tabatin varios kontrol preventivo riba presensia di arma ilegal. Tambe a hasi uso di kámaranan di vigilansia durante eventonan grandi di último lunanan pa yuda mantené órden públiko. Huntu ku kolegio ehektivo i otro instansianan mi a hasi un yamada na minister di hustisia un biaha mas pa sigui reforsá nos kuerpo polisial i e kadena di hustisia en general, pa nos por sigui mantené órden i seguridat.

Ku bista riba futuro, mi a kuminsá e proseso tambe pa traha un maneho integral di seguridat pa e próksimo añanan. E meta di esaki ta pa stipulá medidanan konkreto pa manehá e desafionan riba diferente área di seguridat. Nos lo enkaminá e proseso aki den konsulta ku partnernan den kadena hudisial, pa yega na plannan konkreto i realístiko pa yuda prevení kriminalidat i inseguridat.

Na mes momentu mi ta admití ku pa garantisá seguridat, tin mester di mas ku solamente plannan i akshonnan di polis of otro instansianan. Seguridat ta nos responsabilidat komún. Nos tur tin un parti den dje. P’esei mi ta pidi boso ayudo, pueblo. Laga nos kada un ban duna nos aporte na un isla mas sigur. Esaki ta kuminsá na nos mes, den nos famianan i den nos barionan. Laga nos komo mayornan modelá komportashon positivo pa nos yunan. Rechasá negativismo i agreshon den tur forma. Laga nos komo bisiñanan trata otro ku rèspèt. Laga nos tene nos mes na reglanan di tráfiko I tene kuenta ku otro. Huntu nos por krea un komunidat mas fuerte i resiliente pa e tentashonnan di kriminalidat, basta nos skohe pé. Laga nos RECHASÁ maldat!

Mi ta klousurá gradisiendo tur ku ta kompartí nan eksperensia, sintimentu i sugerensia ku mi. Komo gezaghebber mi ta keda semper habrí pa skucha tokante loke ta biba bou di pueblo. Den e tempu benidero lo mi hasi un esfuerso pa sigui e kombersashon ku persona i gruponan relevante den komunidat tokante seguridat.

Laga nos sigui traha huntu, pa un Boneiru ku ta mas fuerte, mas uní i mas sigur pa tur hende.

Danki pa boso atenshon I esfuerso.