Direktorado di Planifikashon i Desaroyo (R&O) a muda pa un lokalidat nobo. For di djaluna 10 di ougùstùs 2026, Direktorado di Planifikashon i Desaroyo ta situá pa públiko na Kaya Amsterdam s/n, na e promé piso banda di biblioteka.
For di e fecha ei siudadanonan por akudí na e adrès nobo na Kaya Amsterdam s/n pa preguntanan general di Planifikashon i Desaroyo. Ta trata entre otro di pregunta tokante asuntu di tereno, èrfpagt, kadaster i otro pregunta òf súplika ku ta kai bou di Direktorado di Planifikashon i Desaroyo. Pa pregunta tokante pèrmit, siudadanonan por akudí na e bali di Pèrmit na Kaya Grandi 56-58 (den e edifisio di Pèrmit i Supervishon i Mantenshon di Lei - Vergunning & Toezicht en Handhaving). Akí nan por akudí pa entre otro pregunta tokante pèrmit di konstrukshon, pèrmit di establesimentu, pèrmit di naturalesa i otro petishonnan pa pèrmit.
Mester entregá i buska tur petishon, formulario, karta i otro dokumentu pa Direktorado di Planifikashon i Desaroyo na departamento di Pòst i Archivo. For di 15 di yüli 2026, Pòst i Archivo ta registrá tur dokumentu ku ta destiná pa Direktorado di Planifikashon i Desaroyo. Ku e sistema di traha akí, Entidat Públiko Boneiru ta sòru pa un registrashon sentral di dokumentu i un servisio klarito na siudadano.
Entidat Públiko Boneiru ta supliká tur siudadano pa for di 10 di ougùstùs tene kuenta ku e adrès nobo pa bishita di Direktorado di Planifikashon i Desaroyo.
