Diputado Nina Den Heyer ta kontentu ku desishon di e minister pa Maneho di Pobresa Carola Schouten pa redoblá e kompensashon pa mayornan ku tin yu ku ta rekerí kuido intensivo na Hulanda Karibense.
‘Pa hopi aña kaba mi ta insistiendo riba esaki na Den Haag, for di tempu di sekretario di estado Tamara van Ark kaba. Ta imposibel pa splika ku mayornan di un yu ku ta rekerí kuido intensivo na Hulanda Oropeo sí ta haña kompensashon mas haltu pa yu i e mayornan na islanan BES nò, miéntras ku akinan e gastunan ta hopi mas haltu i e provishonnan ménos’, segun diputado Den Heyer.
‘Mi ta haña un lástima ku mester a dura asina tantu tempu. Kisas mi ta un tiki sin pasenshi, pero mi a spera ku lo por a implementá esaki mas rápido ku yüli 2023, pasobra e mayornan ku nos ta papiando di nan, ta pasando den hopi difikultat. Loke ta mas importante ta ku nan a tuma un desishon formal i ku awor akí nan a menshoná un fecha di implementashon. Pa e mayornan i kuidadonan en kestion esaki ta bon notisia.’
Diputado Den Heyer ta spera ku awor ku a bini un minister pa Maneho di Pobresa, nan ta bai traha mas rápido tambe riba otro medidanan pa kombatí pobresa. ‘Dentro di poko mi tin un enkuentro kuné. Mi lo gradisié sigur, pero mi lo splik’é bon kla tambe ku ta basta trabou tin ku hasi ainda pa eliminá e retrasonan ku tin riba tereno di siguridat sosial.’
