Diputado Cicilia ta bishitá Fondo Nashonal di Restorashon: ‘Patrimonio na Boneiru meresé mas atenshon’

Na okashon di e 40 aniversario di e Fondo Nashonal di Restorashon (Nationaal Restauratiefonds – NRF), diputado Anjelica Cicilia di Boneiru resientemente a hasi un bishita na e ofisina prinsipal di e instituto akí na Hulanda. Riba invitashon di e fondo el a ekspresá su apresio pa e trabou ku e Fondo Nashonal di Restorashon a hasi durante e último dékadanan riba tereno di kuido di monumento – tantu na Hulanda Oropeo komo den e parti karibense di Reino.

‘E trabou di e Fondo Nashonal di Restorashon ta di balor inkalkulabel pa konservashon di nos patrimonio konhunto,’ segun Cicilia. ‘Nan dedikashon i ekspertisio ta esensial, prinsipalmente pa islanan manera Boneiru, kaminda e medionan finansiero ta limitá i e desafionan ta grandi.’ 

Durante su bishita enfátikamente e diputado a pidi atenshon pa situashon di e monumentonan na Boneiru. Hopi edifisio históriko ta den un estado deplorabel, i tin kestion di un retraso konsiderabel den mantenshon i redestinashon. Tantu Entidat Públiko Boneiru komo nos komunidat lokal ta disponé di medionan finansiero limitá pa por rekuperá e retraso akí riba nan mes. Pa suprayá e problemátika akí den forma simbóliko, Cicilia a hasi entrega di un pùzel di e edifisio ikóniko di Passangrahan na e Fondo Nashonal di Restourashon, huntu ku un invitashon pa traha konhuntamente riba un solushon pa un mihó konservashon di patrimonio na nos isla.

‘Konservashon di monumento ta meskos ku trahamentu di un pùzel,’ asina Cicilia a bisa. ‘Kada pida ta konta un storia tokante nos historia kompartí. Solamente huntu nos por hasi e totalidat kompleto i sòru pa e patrimonio akí keda konservá.’

E Fondo Nashonal di Restorashon, ku ta aktivo for di aña 1985, ta sostené doñonan di monumento ku finansiamentu, konseho i konosementu. Na Boneiru tambe e fondo ta aktivo. Anteriormente nan a otorgá fiansa na Fundashon Cocari II pa restorashon di Kas di Sùr i Skol San Ludovico (Ludovicusschool) na Rincon. Entretantu e edifisionan monumental akí a haña un funshon nobo komo akohida durante dia pa hende grandi.

E bishita di diputado Cicilia ta aksentuá importansia di kolaborashon pa konservá e patrimonio úniko di Boneiru – pa nos komunidat di awor í e generashonnan di futuro. Esaki pasobra Boneiru su patrimonio ta forma un parti inseparabel di historia di henter Reino. E ta konta hopi storia di solidaridat, resiliensia i kultura, ku ta di balor pa nos tur – komo komunidat, komo pais i komo futuro konhunto.

Hans Jacobs di e Fondo Nashonal di Restorashon a bisa: ‘Tabata un plaser pa risibí diputado Cicilia serka nos. Su enbolbimentu i e manera ku e ta trese e patrimonio di Boneiru bou di atenshon, a konmoví nos. Nos ta rekonosé e desafionan ku Boneiru ta enfrentá i gustosamente nos ta yuda pensa tokante kon pa solushoná e pùzel di patrimonio akí. Huntu nos por sòru ku e patrimonio balioso den Hulanda Karibense akí tambe ta keda konservá pa futuro.’