Awe ta Dia Mundial di Alzheimer. Entidat Públiko Boneiru (EPB) ta pidi atenshon pa hende ku demensia i nan sernan kerí. Na Boneiru e hende ta sentral, no e malesa. Un persona ku demensia tin su propio historia di bida, deseonan i posibilidatnan.
Entidat Públiko Boneiru tambe ta kontribuí ku un granito i ta trahando riba un maneho di demensia pa henter nos isla, den sinkronisashon ku ministerio di Salubridat, Bienestar i Deporte (VWS), i Kuido i Hubentut Hulanda Karibense (ZJCN). Diferente organisashon for di kuido i bienestar, entre otro Fundashon Alzheimer Bonaire i Stichting Mantelzorg Bonaire, ta enbolbí ku esaki.
E meta ta pa hende ku demensia haña guia, tratamentu i kuido adekuá, i pa nan partisipá mas tantu tempu posibel den nos komunidat. Direkshon propio i kalidat di bida ta puntonan di salida importante den esaki. Ta enbolbí nan sernan kerí aktivamente i na un manera ekivalente.
Entidat Públiko Boneiru ta sostené inisiativanan konkreto tambe. Un ehèmpel di esaki ta ku EPB ta supsidiá Fundashon Alzheimer Bonaire (FAB) pa entre otro un ora di informashon i konsulta tokante demensia. E aña akí FAB ta eksistí 15 aña i tur e tempu ei nan a komprometé nan mes pa mas konsientisashon, konosementu i informashon tokante demensia i pa sosten pa hende ku demensia i nan sernan kerí. Awe riba Dia Mundial di Alzheimer, direktiva di FAB a entregá diputado Silberie e Relato Mundial tokante Alzheimer 2026 (World Alzheimer Report 2026). Tur aña e fundashon ta hasi esaki.
Banda di esaki Entidat Públiko Boneiru ta enbolbí ku desaroyo di e Trayekto di Kuido i Bida Demensia. Dentro di poko e Trayekto di Kuido i Bida ta bira disponibel via wèpsait di EPB.
Un komunidat kaminda hende ku demensia por sigui partisipá, ta rekerí komprenshon i atenshon di tur hende. Pa medio di rekonosé demensia i papia tokante esaki, nos por kontribuí na un ambiente kaminda hende ku demensia i nan sernan kerí ta sinti nan mes sostené.
