Kerido pueblo di Boneiru,
Awor ku mi tempu komo gezaghebber ta yegando su fin, mi kier tuma un ratu pa ekspresá mi sinsero gratitut pa e oportunidat pa por a sirbi e presioso isla akí i su bunita hendenan. E último añanan nos a traha duru pa logra un Boneiru mas fuerte i resistente. Huntu nos a logra hopi, di stimulá nos ekonomia i protehé nos medioambiente, te na fortalesé nos komunidat i mehorá bida di tur habitante. Tambe nos por konstatá ku siguridat en general na Boneiru a mehora e ultimo añanan.
Mi mester atmití ku e kresementu di poblashon ta ehersé preshon riba nos isla i ku tin diferente kultura i kustumber ta kombibí ku otro riba nos isla. Esaki ta rekerí esfuersonan aktivo di kada un di nos pa mantené un bon relashon ku otro. Mi ta kontentu di mira ku opstante tur e diferensianan tòg nos ta logra den esaki i ta biba den harmonia ku otro. Banda di esei nos a demostrá ku Boneiru ta sufisiente fuerte pa vense un pandemia. Esaki lo no tabata posibel sin e sentido di union i aporte di abo komo siudadano, hóben i grandi, abo komo impresario, trahadó, profeshonal i boluntario. Danki na boso tur nos a sali mas fuerte for di esaki.
Pero ainda tin hopi trabou pa hasi i mi sa ku mi susesor lo sigui traha riba e progreso ku nos a logra i lo sigui yuda e isla aki, di manera ku tur hende por tin un eksistensia igual. Awor ku mi ta preparando pa bandoná e funshon akí, mi kier hasi uso di e oportunidat pa gradisí kada un di boso pa boso sosten i dedikashon pa hasi di Boneiru un mihó lugá. Tabata realmente un honor pa ta boso gezaghebber i semper lo mi sigui karisiá e rekuerdo- i eksperensianan ku mi a atkirí e último nuebe añanan. Mi kier enkurashá boso tur pa sigui kooperá ku otro e añanan benidero, sigui tira bista riba otro i sigui sostené otro. Huntu nos por vense tur opstákulo i logra kosnan grandi pa e presioso isla akí. Un di e opstákulonan ei ta e kambio di klima na Boneiru. Mi ta deseá ku mi susesor lo kue e tema aki tene duru, pa atendé riba término kòrtiku e puntonan problemátiko urgente i riba término largu yega strukturalmente na un maneho di awa duradero.
Awor ku e elekshon di konseho insular ta tras di lomba, mi kier a deseá tambe e mandatarionan nobo hopi éksito, pero partikularmente hopi sabiduria. E komienso di un periodo nobo di gobernashon i yegada di nos sekretario insular nobo ta nifiká inovashon, desaroyo i kontinuidat. Mi ta ekspresá e deseo ku den e kolegio ehekutivo nobo, koló polítiko no ta konta, pero ku den tur desishon ku lo bai tuma, poblashon di Boneiru ta na promé lugá.
Kerido habitantenan di nos isla, a yega tempu pa bisa ayó, pero ami no ta mira esaki komo un despedida di bèrdat. Mi ta keda biba i traha riba Boneiru i sigui hasi esfuerso pa bienestar di boso tur. Lo mi sigui apresiá e tempu ku mi a pasa aki i ta ansioso pa wak tur e tremendo progresonan ku boso lo logra den futuro. Te despues, tot gauw, see you soon, hasta pronto!
Klek riba e lenk pa e mensahe di vidio: https://www.youtube.com/watch?v=Qn5-PKeeKc4
