Departamento di Salubridat Públiko ta spera ku e di dos dia tambe pa pasa angua kontra corona i grip na Jong Bonaire dia 26 di òktober lo ta un éksito. Durante e promé dia di pasa angua riba djasabra 19 di òktober, 350 hende a pasa e dos anguanan. E angua kontra corona i e angua kontra grip ta intenshoná pa hende di 60 aña bai ariba. E aña akí ta e promé biaha ku hende di 60 aña bai ariba i hende ku un salú vulnerabel por pasa e angua kontra grip, e angua kontra corona òf tur dos angua sin sita si nan ta deseá esaki.
Pa pasa e angua(nan) mester bai ku un sédula òf pasport. Hende ku ke pasa e angua kontra corona, na yegada mester yena un deklarashon di salú promé. Despues ku nan pasa e angua kontra corona, nan ta keda sinta 15 minüt mas pa opservashon. Na kuminsamentu di e luna akí tur hende di 60 aña bai ariba na nos isla a haña un karta ku un invitashon pa bin pasa e angua(nan). No ta nesesario pa bai ku e karta akí ora un persona ta bai pasa un òf tur dos angua. E angua kontra grip i e angua kontra corona ta intenshoná tambe pa hende di 60 aña bai ariba ku temporalmente ta na Boneiru i pa e motibu akí no por pasa e angua(nan) na nan propio pais.
Despues di 26 di òktober 2024 te ainda ta posibel pa pasa e angua kontra grip i e angua kontra corona. Por hasi esaki serka e diferente dòkternan di kas na nos isla. Pa un bista general amplio, wak riba www.bonairegov.com/angua. Bo tin pregunta? Yama e ora ei durante ora di ofisina e number grátis 0800 0800.
