Departamento di Salubridat Públiko ta pidi atenshon pa Dia Mundial di Alimento 2022

E aña akí lema di e selebrashon tabata ‘a better production, better nutrition, a better environment and a better life’, ku nos por tradusí komo ‘un mihó produkshon, mihó nutrishon, un mihó medio ambiente i un mihó bida.’ Ku e tema i e lema akí nan ta pidi atenshon pa siguridat mundial di kuminda i kombatimentu di hamber.

Food and Agriculture Organization of the United Nations (FAO) ta organisá e Dia Mundial di Alimento i e ta un ehekushon ku ta kai bou di e metanan sostenibel di desaroyo di Nashonnan Uní. E aña akí a para ketu na entre otro kon retonan manera e pandemia, kambio di klima, subida di preis i pobresa ku ta oumentando ta trese siguridat di alimento na peliger i kiko por hasi kontra esaki. Pasobra segun FAO alimento saludabel mester ta aksesibel pa tur hende. Pa e motibu akí FAO ta hasi un yamada riba tur hende pa traha huntu riba un situashon kaminda diariamente ta hasi alimento saludabel posibel pa tur hende. Un paso importante ta kaminda ta stimulá plantamentu di kuminda serka tur grupo di edat.

Na Boneiru Entidat Públiko Boneiru ta traha huntu ku partnernan di kadena riba kombatimentu di pobresa i stimulashon di plantamentu di kuminda propio. Departamento di Salubridat Públiko por ehèmpel ta duna atenshon na stimulashon di un estilo di bida saludabel serka tur grupo di edat pa medio di entre otro ehekushon di e programa di bèrdura i fruta. Serka e programa akí ta pertenesé e kampaña ku yama ‘Sembr’Awe Pa Kosechá Mañan’. Ku e kampaña akí ta duna atenshon na plantamentu di palu di fruta i diferente sorto di bèrdura endémiko, ku ta krese mas mihó den nos klima i tambe preparashon di kosecha. E departamento di Agrikultura, Krio di Bestia i Piskamentu (LVV) tambe konosé vários inisiativa kaminda ta traha riba produkshon di kuminda propio riba eskala grandi i chikitu.

Den kuadro di e programa di bèrdura i fruta Salubridat Públiko i LVV ta traha huntu ku diferente eksperto pa stimulá plantamentu di kuminda propio ku ekspertisio di ántes, pero tambe ku téknikanan moderno. Den e programa ta duna atenshon na tur edat, pero na hóbennan en partikular. Un ehèmpel di e kolaborashon akí ta e propio greenhousenan ku tin na 10 skol pa laga hóbennan sera konosí ku plantamentu di kuminda ku ta kontribuí na alimento saludabel.

Dentro di poko ta amplia e proyekto di greenhouse pa bai den tur bario.

Departamento di Salubridat Públiko ta hasi un yamada riba tur hende pa traha huntu riba kultivo duradero di kuminda ku ta aksesibel pa tur hende. Pa mas informashon wak riba www.bonairegov.com  

“Sembr’Awe Pa Kosecha Mañan”