Departamento di Salubridat Públiko ta atvertí pa posibel daño na oido pa motibu di sonido duru

Ku un riesgo mas haltu pa eksposishon na sonido muchu duru durante e selebrashonnan di karnaval, departamento di Salubridat Públiko ta atvertí ku esaki por kondusí na daño (permanente) na oido. Pa yuda prevení daño na oido, durante e marchanan di karnaval nan ta parti protekshon grátis pa orea ku e konseho na bishitantenan, partisipantenan i músikonan pa hasi bon uso di esakinan. E protekshonnan pa orea ta fásil pa usa i Fundashon Klave huntu ku entre otro Skol Amplio Papa Cornes, Zorg en Welzijn groep i empleadonan di fundashon AKSESO ta parti nan.

Karnaval ta un periodo di fiesta i dibertishon ku hopi biaha sonido i músika duru. Manera por ehèmpel durante e marchanan di karnaval, loke por kondusí na daño permanente na oido. Pa e motibu akí departamento di Salubridat Públiko ta hasi bishitantenan konsiente di e riesgo mas haltu pa daño na oido i ta suministrá medionan preventivo manera protekshon grátis pa orea. E protekshonnan grátis pa orea ta parti di un kampaña amplio di protekshon di salú. Den kuadro di esaki e departamento ta hasi un yamada pa durante e karnaval akí hasi uso responsabel di medionan manera alkohòl, droga i tabaku, bebe sufisiente awa, kome salú i protehá bo mes kontra solo fuerte.