Dentro di poko mester paga impuesto di vehíkulo di motor 2023

Pa mas tardá na kuminsamentu di luna di yanüari 2023 via pòst suidadanonan ku ta den poseshon di un outo òf motosaikel ta risibí un karta ku e título ‘Aanslagbiljet’ pa paga impuesto di vehíkulo di motor. Den e karta akí nan ta splika kon, kuantu i ki dia mester paga e impuesto di vehíkulo di motor.

Suidadanonan mes ta responsabel pa e plachinan di number ku nan a risibí di Entidat Públiko Boneiru. Den kaso ku tin kambio pa loke ta trata plachi di number, e ora ei mester pone departamento di Finansa di Entidat Públiko Boneiru na altura di esaki. Si por ehèmpel a bende un outo i e plachi di number no ta den uso mas òf e outo a daña, e ora ei e konseho ta pa entregá e plachi di number. Di e manera akí lo no tin mester di paga impuesto mas riba e plachi di number akí. Doñonan di plachi di number ku nan ta entregá den luna di desèmber di e aña akí òf ku nan ta bende, tambe lo risibí un ‘aanslagbiljet’, pero pa mas tardá na fin di luna di yanüari 2023 lo koregí esaki.

Segun propio eskoho por paga impuesto di vehíkulo di motor den dos término igual. E ora ei mester paga e promé termino (e promé mitar di e suma) promé ku 1 di aprel 2023. E di dos término (e suma restante) mester paga e ora ei promé ku 1 di yüli 2023. Dia 1 di aprel 2023 nada no ta pagá ainda? E ora ei for di 2 di aprel 2023 mester paga henter e suma den un solo biaha. Den e karta ku dentro di poko nan ta parti kas pa kas, tin mas informashon tokante e posibilidat di pago den dos término.

Ta posibel tambe pa paga e impuesto di vehíkulo di motor promé ku a risibí e ‘aanslagbiljet’. Por hasi esaki ku pago via internèt òf na lokèt di bo banko. E ora ei na referensia di pago (betaalkenmerk) mester nota bo number di CRIB/01base23plachi di number. Ehèmpel: 123456789/01B23B1234. Manera a indiká akí riba mester nota e referensia di pago ku e / den e espasio di teksto. Di e manera akí ta evitá problema na momentu di prosesamentu di e suma ku a drenta. Si skohe pa paga e impuesto di vehíkulo di motor mas tempran, e konseho ta pa warda e komprobante di pago bon. Asina ta evitá ku eventualmente mester paga un biaha mas.

Por transferí pago di e ‘aanslagbiljet’ pa e siguiente numbernan di kuenta:

• R.B.C.:                8400000180872997 – RBTTBQBN
• ORCO BANK:     7601000195 – ORBABQBN
• M.C.B.:                402.917.08 – MCBKBQBN
• B.D.C.:                30638802 – BDCCBQBN

E estado di kuenta di banko (statement) ta bálido komo komprobante di pago.

Den e skema akí bou por mira kua suma mester paga di impuesto di vehíkulo di motor.

Akí mester paga tinu riba e tipo di kombustibel i e lèter riba e plachi di number.

Si tin pregunta tokante e impuesto di vehíkulo di motor por manda un email na belasting-olb@bonairegov.com òf yama na 717 5330 ekstenshon 5326.