Resientemente un delegashon di Sint Maarten a hasi un bishita di trabou na departamento di kultura di Entidat Públiko Boneiru: SKAL (Sekshon di Kultura, Arte i Literatura). E bishita tabata den signo di sera konosí i interkambio riba tereno di kultura i patrimonio den e parti karibense di Reino.
E kwartiermaker di kultura, Alfrida Martis, a risibí e minister di Enseñansa, Kultura, Hubentut i Deporte di Sint Maarten, Melissa Gumbs, i sra Martis a duna un rekorido den e museo i a konta tokante e proyektonan ku ta andando i e inisiativanan riba tereno di patrimonio kultural i desaroyo di komunidat.
Despues e delegashon a bai den kòmbersashon ku empleadonan di SKAL i diputado Clark Abraham. Durante e kòmbersashon diferente tema a bini dilanti, manera profeshonalisashon mas aleu di SKAL, kolaborashon duradero entre e islanan i e pregunta kon kultura por aportá na fortifikashon di turismo sostenibel. Ámbos partido a pone énfasis riba importansia di esfuersonan konhunto pa konservá i fortifiká identidat kultural i balor di patrimonio di e region.
A finalisá e bishita ku e intenshon pa investigá e kolaborashon entre Sint Maarten i Boneiri i pa sigui invertí den un sektor kultural fuerte ku enfoke riba futuro. Entidat Públiko Boneiru ke gradisí minister Melissa Gumbs i su delegashon pa e interes ku nan a mustra den SKAL i su empleadonan.
