“Loke a pasa e fin di siman akí mester preokupá nos tur. No solamente pasobra a usa un arma di kandela kontra propiedat di un agente polisial loke ta un krímen kastigabel, sino pasobra e reakshonnan despues ta mustra un tendensia ku nos no por ignorá: tin hende ta hustifiká i asta aploudí menasa, intimidashon i violensia.
KPCN a duna un mensahe kla: no ta tolerá violensia i intimidashon kontra agente polisial. Komo gezaghèber mi ta sostené e mensahe akí. Nos agentenan i tur hende ku ta traha pa seguridat i òrden públiko mester por hasi nan trabou sin intimidashon. Na momentu ku esnan ku ta traha pa siguridat i òrden públiko ta bou di menasa, nos estado di derecho ta bou di menasa.
Pero e prinsipio aki ta bai mas leu. Violensia no ta aseptabel kontra polis, kontra ambtenar, ni kontra ningun otro hende den nos komunidat.
Nos por tin desakuerdo. Nos por ta rabiá. Nos por ta krítiko. Esei ta parti di un komunidat kaminda hende tin libertat pa ekspresá nan mes. Pero rabia no ta un ekskusa pa menasa. Desakuerdo no ta un hustifikashon pa agreshon. I violensia no por bira nos manera di reakshoná riba otro.
Loke ta preokupá mi partikularmente ta ora nos kuminsá mira violensia na un manera diferente, dependé di ken e víktima ta. Ora nos bagatelisá, hustifiká òf asta aploudí violensia pasobra nos no ta di akuerdo ku e persona riba ken e violensia ta dirigí, nos ta normalisá algu ku bou di ningun sirkunstansia lo no por ta normal. Mi ta hasi un apelashon riba nos lidernan den e komunidat akí pa sali i kondená e menasa i agreshon ku ta tumando lugá den nos komunidat i espesialmente riba medionan sosial.
Nos tin ku puntra nos mes: esaki ta e Boneiru kaminda nos ke biba? Esaki ta e Boneiru ku nos ke laga pa nos yunan?
Mi ta hasi un yamada na nos komunidat: laga nos pensa promé ku nos reakshoná, skucha promé ku nos husga i sigui mira e ser humano den otro. Ningun hende mester biba ku miedu pa violensia. Kambio ta kuminsá ku nos mes.”
Gezaghèber John Soliano
