Djamars 11 di òktober último tabatin un reunion públiko di Konseho insular ku a terminá djárason den oranan tempran di mainta. Ku voto di 5 pro i 4 kontra konseho insular a bai di akuerdo pa instruí gezaghèber interino pa kordiná un investigashon pa ekspertonan independiente riba e presunto indikashon di violashon di integridat di parti di mi persona komo gezaghèber. Den e moshon ta indiká ku dentro di dos siman despues di komienso di e investigashon ta presentá resultado i posibel rekomendashonnan na Konseho Insular. Tambe den e moshon tin e petishon pa durante e periodo di e investigashon aki mi persona lo no ta aktivo den funshon di gezaghèber.
Sin drenta muchu den e aspekto tékniko di e moshon aki mi ke aklará ku pa lei nombra, skòrs i saka for di funshon di un gezaghebber no ta un responsabilidat di Konseho Insular sino Rei ku ta duna e mandato na Minister di asuntunan Interino i Relashon den Reino.
Mi a reflehá hopi e último oranan aki riba e intenshon di e moshon aki i ta komprondé ku konseho insular kier trese klaridat riba riba sierto informashon ku a keda publiká resientemente tokante funshonamentu di mi persona komo gezaghebber.
Paso mi persona ta haña importante pa trese klaridat den e situashon aki mi a tuma desishon ku mi ta bai krea tur espasio pa un investigashon. Pa e motibu aki mi a disidí ku na komienso di e investigashon ta skohe pa bai ku fakansi pa dos siman en espera di e konklushon di e investigashon. Mi tin tur konfiansa ku un investigashon di forma transparente i ophetivo ta tuma lugá i mi ta deseá e ekspertonan aki tur klase di sabiduria i éksito pa nan por realisá nan trabou.
Durante mi periodo di ousensia manera ta stipulá den lei gezaghèber interino lo tuma mi tareanan ofer. Mundu ta pasando den un desaroyo aselerá di kua nos isla tambe ta eksperensiá esaki. Tur indikashon di presunto violashon di integridat òf falta di transparensia por stroba e desaroyo positivo. Pa e motibu ei mi ta hasi un súplika urgente na komunidat den su totalidat. Laga nos no spekulá i krea insinuashonnan, pero warda resultado di e investigashon.
